محل مشهور بالـــــــ “لبن” .. بلاش تلعب مع الزبائن أحسن هتقفل قريب !!
كتير من المحلات والمطاعم بيعملوا كده
حركة وسخة بصراحة
النهارده روحت عند محل مشهور بــــ ( اللبن ) ، و طلبت الاوردر بيتاعي و طلعلي رقم ٩٣ ، احفظ الرقم دا عشان هنستخدمه تاني .
المهم واقف مستني دوري طبيعي ، راجل بجانبي بيسأل احد موظفين المحل عن الاوردر بتاعه بيقوله :
_ ونبي شوف لي كدا الاوردر بيتاعي انا رقم ٩١ و طالب واحده قشطوطه و واقف بقالي ياما .
= لا لسه يا باشا احنا في ٨١ … لسه قدامك شوية
_ معلش هو مش هي الي محطوطه هناك دي و جاهزه ؟
= اه هي
_ طب ماتجيبها !!
= معلش مش هينفع ، في ناس قبلك ، اكيد مش هطلعك و اسيب الناس دي كلها قبلك .. هيزعلوا
_ حضرتك انا ورايا مشاوير و واقف تعبان و اكيد مش هستني كل دل و انا الاوردر بيتاعي جاهز !
= حضرتك لو مش عاجبك ممكن تلغي الاوردر
_ تمام انا هلغي الاوردر
الراجل خد الفلوس و مشي ، نتخظي قلة الذوق الي موظف المحل بيتكلم بيها دي و عدم الاحترام ، و ان الراجل الي مشي دا هو و الي زيه بياكلوه عيش و لازم يعاملوه باحترام ، و نقول ان بعد ما الراجل مشي بلحظات ، مدير الفرع راح له و لحقه و أتأسف له ، و رجع ل موظف المحل و قال هات الاوردر بتاع الراجل دا .= ايوه بس …
_ اسكت خالصصصص … الراجل بيقولك تعبان و عنده مشاوير … ايه المشكلة لو طلعتهوله ، حسابنا بعدين .
في اللحظه دي كنت مركز في الحوار و لقيت امي بتخبط علي كتفي و بتقولي بينده علي رقمك !! .. رقمي ؟ انا ٩٣ ! ، امال فين الي قبل كدا ؟ ٨٣ ، ٨٤ ، ٨٩ ، ٩٠ ؟ هو مش المفروض بيمشي بالترتيب ؟ مش المفروض الراجل ابو ٩١ هو الي ينده عليه قبلي ؟ ولا هي بتمشي ازاي ؟ فكرة انك تاخر الزباين عندك عمدًا عشان الناس تتجمع عندك و يبقي حوالين المحل ناس كتير و تلفت الانتباه ، دي فكرة تسويق قذرة ، في ناس وراها مشاوير و مصالح ، و في الي تعبان و مش بيقدر يقف ، و في الي مستعجل و عنده أولويات ، و انت حضرتك سياسة محلك بتقولك وقف الناس عشان تلفت الانتباه .بصراحه حركة و سياسة مش لطيفة ، مهما كان الي بتقدمه جودته كويسة و مهما الناس بتحبك ، لكن سياستك الغير سوية ممكن ترجعك لورا .
