د. أشرف شومه يكتب: مواقف انسانية من الحياة
عميد كلية الطب – جامعة المنصورة
بحكم عملي بقابل العديد من الأسر المصرية الكريمة .. اب مجتهد جداً + أم واعية ويقظة + اولاد متفوقين ربنا اكرمهم بالقبول في كليات طب مرموقة ..!!
وكتير تعرض علي قصص تخص طلاب وتلاقي الأب في الغالب – واحيانا طبعاً الأم – جايلي وهو مجزوع .. تشوف قلبه هيخرج من بين ضلوعه بسبب مشكله لأبنه .. الولد مريض لكن قُبل في طب السويس ومحتاج يجيبه المنصورة .. البنت رسبت دور اول وثاني وبتدور علي اي تظلم يسمح لها بالإستمرار والمرور للعام التالي .. الولد بيذاكر كويس لكن بيدخل اختبارات مش بيجيب اي درجات .. قصص تخليك مش عارف تتصرف ازاي لكن تتعجب من ارتباط المصريين بأولادهم – وتحس ان الوالد ممكن يسيب لك عينه مثلا بس المشكله تلاقي حل ..!!!
الغريب بقي انك لما تعيش مع القصص دي شوية – وتقرب من الأسرة اكتر .. تلاقيهم بيعانوا من الولد او البنت اشد معناه .. والعجيب لي فعلا هو اللغه والألفاظ الصادره من الأبناء لآبائهم وامهاتهم اليوم .. تلاقيه ولد كيوت وامور ومهذب لكن بيعرف يقول لابوه “أنت اصلك اناني – ومش بتسمع وجهه نظري” .. “أنا هسمع كلامك بس علشان انت بتصرف علي” .. “انتِ بأي حق تختاريلي اصحابي او تقوليلي اكلم مين ومعرفش مين ” .. الفاظ عجيبة من اولاد المفروض انهم اتعلموا كويس من ابتدائي “ولا تقل لهما اف ولا تنهرهما وقل لهما قولاً كريما” ..!!!!
انا بقول للولاد دول – انتم حياتكم واقفه وهتقف بهذا السبب وانت مش شايف ولا فاهم .. اي حد قلبه بيتخلع عليك لا يمكن يكون ضدك .. وصولك لعتبة مكتبي يعني انك تعبت واجتهدت لكن ده عمره ما كان هيحصل بدون ام قاعده كل يوم بتتفنن علشان بس تغديك .. واب شقيان علشان يعمل منك دكتور .. ومش ذنب اي فرد انه معندوش ربع مليون جنيه يدفعهم سنويا في جامعة خاصة ليك او يكون من الصبر والحكمة يشوفك بتتأخر كل سنه وميكونش متوتر او حتي غضبان ..!!!
أنا بحبكم .. لكن بشوفكم مغيبين .. بتفقدوا بإرادتكم اغلي ما تملكون .. اللهم لك نشكو منهم – ونعوذ بك من غضبك عليهم ..!!!!
