المستشارة هدى الخضراوي تكتب: يعني إيه محامي؟
مش بس لقب بيتقال، ولا مجرد وظيفة بتتكتب في البطاقة.
المحامي هو اللي اختار يكون في صف اللي مالهمش صوت، اللي عندهم حق ومش عارفين يوصلوا له، واللي ظلمهم أقوى منهم.
الكلمة جاية من الفعل “حامى”، يعني دافع وحمى،
يعني واقف قدّام الظلم مش علشانه، لكن علشان حد تاني مايعرفش يدافع عن نفسه.
المحامي مش شاطر علشان بيعرف يتكلم
المحامي الحقيقي بيعرف إمتى يتكلم، وإزاي يختار كلمته
علشان كل كلمة منه ممكن تفتح باب، أو ترد حق، أو تنقذ حياة
هو مش بيشتغل بالقانون بس،
هو بيشتغل بالضمير، بالحس، بالإحساس بالناس
وبيمشي بين السطور علشان يطلع من النصوص عدالة حقيقية مش بس ورق
المحامي اللي فاهم مهنته، عارف إنها مش ساحة شهرة
ولا مكان للمساومة
دي ساحة احترام
واللي بيقف فيها لازم يبقى قدها
علشان المهنة دي ما بتقبلش النص نص
يا تكون صوت حق
يا تبقى مجرد واحد لابس روب
