سارة الشيشتاوى تكتب: “رجعت ريمة لعادتها القديمة”
مثل بنقوله لما حد يحاول يغير عادة قديمة فيه، ويقول خلاص المرة دي هتغير، وبعد شوية نلاقيه رجع تاني لنفس اللي كان بيعمله
بس يا ترى مين ريمة دي؟ وليه بقت حكايتها مثل بنقوله لحد النهاردة؟
الحكاية بتتحكي عن ست أسمها ريمة، كانت متعودة على عادة معينة، وكل ما تحاول تبطلها ترجع لها تاني
وفي مرة قررت إنها خلاص هتبدأ من جديد
قالت للي حواليها
“خلاص، المرة دي هتغير ومش هرجع تاني”
وفعلا كام يوم عدو وكانت ملتزمة بكلامها، لدرجة أن ان جارتها قالت لها
“برافو عليكي يا ريمة، أهو الواحد لما بيصمم بيقدر يتغير”
ريمة فرحت بالكلام، وحست إنها فعلا قدرت تعمل اللي وعدت بيه
لكن الإنسان ساعات بيكون أقوى في الكلام من الفعل
عدت الأيام، وحصل موقف بسيط رجع ريمة لنفس عادتها القديمة
جارتها شافتها وقالت لها وهي بتضحك
“رجعتي يا ريمة لعادتك القديمة”
ومن هنا بقت الجملة تتقال لكل واحد يحاول يغير حاجة فيه، وبعد فترة يرجع يعملها تاني
والحقيقة أن ان المثل ده مش عن ريمة بس
يمكن كل واحد فينا عنده “ريمة” جواه
عادة بنقول هنسيبها
قرار بنقول هنلتزم بيه
حاجة بنقول دي آخر مرة
وبعد شوية نلاقي نفسنا رجعنا تاني
يمكن عشان التغيير مش مجرد كلمة بنقولها في لحظة حماس
التغيير الحقيقي إنك تفضل ثابت حتى لما الحماس يخلص
وعشان كده فضل المثل عايش لحد النهاردة
كل ما حد يرجع لنفس عادته القديمة، نبتسم ونقول
“رجعت ريمة لعادتها القديمة”
وأنت بقي قولنا إيه العادة اللي
” ريمة” اللي جواك رجعتلها تاني هههههه .
