ياسمين شفيق تكتب: الامانه مش كلمة بنقولها دي حياة بنعيشها

إيه هو معنى الأمانه؟
الأمانة مش بس إننا ما نسرقش ومش بس إننا تقول الصدق ومانكذبش.
الأمانة هى قلب نظيف، وضمير صاحي، وشخص بيخاف ربنا فى كل تصرفاته.
الأمانة هى إنك تبقى أد الثقة وأد الحب وأد كل عمل إنت بتقوم بيه.
الأمانة ببساطة هي الأختبار الحقيقي لشخصيتنا.
الأمانه هي اللي بتبان في تصرفاتنا الصغيرة قبل الكبيرة،
هى اللى بتبان في كلامنا، وفي علاقاتنا، وفي شغلنا، وفي تعاملنا
مع الناس.

بس فى البدايه خليني أقول أهم نوع من انواع الامانه وهى:

الأمانة مع ربنا وهي الأصل بالنسبه لجميع أنواع الأمانه الموجوده فى حياتنا، بمعنى إن لو أنا مش أمين مع ربنا مش هاعرف وصعب أكون أمين مع أى حد او أمين فى أى حاجه.
الأمين مع ربنا صعب إنه يكون خاين مع أى حد أى خاين فى أى حاجه!

إيه هو معنى الأمانه مع ربنا؟

الامانه مع ربنا يعني أخافه فى كل تصرف بتصرفه، أخافه فى كل كلمه بتطلع منى ، فى كل فكر بفكره، فى كل عمل بقوم بيه.
الأمانة معناها إخلاص معناها إنك تعمل الصح حتى لو محدش شايفك ، معناها إن ضميرك يفضل صاحي حتى في السر. معناها إنك تخاف تظلم، وتخاف تكسر خاطر، وتخاف تكذب وتخاف تخون وده مش عشان خاطر الناس لكن عشان خاطر علاقتك بربنا.
وده يقولنا ويعلمنا إن لما نكون لوحدنا لازم نبقى نفس الشخص اللي قدام الناس وهو ده المعنى الحقيقى للأمانه، يعنى لو الأمانة ثبتت بينا وبين ربنا هاتثبت
لوحدها فى كل علاقاتنا وتعاملاتنا وحياتنا كلها.

وهنا كل الأديان السماوية أكدت على أهميه وجود للأمانه جوانا وفى حياتنا:

* مثلا في الإنجيل المقدس قيل عن الأمانه:
الأمين في القليل أمين أيضًا في الكثير (لوقا 16:10)

*وفي القرآن الكريم قيل عن الأمانه:
إِنَّ اللَّهَ يَأْمُرُكُمْ أَنْ تُؤَدُّوا الأَمَانَاتِ إِلَى أَهْلِهَا (النساء: 58)

يعني الأمانة هنا هى مش إختيار لكن هى لازم تكون
إسلوب حياه.

ومن هنا نتطرق لأنواع الأمانه الموجوده فى حياتنا
ومنها مثلا:

الأمانة في العلاقات:
يعنى الامانه بين الزوج والزوجة هى مش بس عدم الخيانة بالجسد لكن هى كمان عدم الخيانه في الحب والمشاعر، وعدم الخيانة فى الأهتمام وعدم الخيانة فى الأسرار وعدم الخيانه فى توزيع الحقوق. وعدم الخيانه فى العشره. وده معناه إن نكون أمناء مع بعض فى كل تعاملاتنا كزوج وزوجه ومنها مثلا مانفضحش نقاط ضعف الشريك أو نذله بيها قدام حد او
او قدامه هو شخصيا ، مانقللش منه في غيابه او فى وجوده او قدام الغير، ما نخليش حد ياخد مكان الشريك مكان مش من حقه في قلبنا او فى حياتنا عموما.

* نيجى للأمانه بين الخطيب والخطيبة:
الأمانة هنا بتكون إختبار بدرى شويه يعنى لو من البداية العلاقه فيها لف ودوران وسكك مش مظبوطه،
يبقى الطريق كله هيبقى متعب وصعب ونهايته محكوم عليها بالفشل، لازم من البدايه يكون فى أمانه الوضوح وأمانه النية الصافية
وأمانه عدم اللعب بالمشاعر وأمانه فى الغرض من الارتباط.

*ونيجى لنوع أخر من انواع الأمانة وهى الامانه بين الأصحاب:
الصاحب الأمين مش اللي يقولك حاضر وطيب وخلاص او يسقفلك على اى حاجه بتعملها سواء صح او غلط أو يكون شايفك بتعمل الغلط ويسيبك.
الصاحب الأمين هو اللى يكون مرايتك هو اللى لما يشوفك بتغلط ينصحك ويوعيك، ولما يشوفك بتنجح وتعلى يفرحلك ويكون جنبك، الصديق الامين هو اللي يحفظ سرك، ويخاف عليك من نفسك، ويقولك الحق حتى لو هتزعل منه، هو اللى يلحقك لو شافك هاتقع ، هو اللى يدافع عنك فى غيابك لو ده مستدعى وهو اللى يجيب غيبتك بالحق لو شاف حد بيظلمك او بيتهمك بالكدب.
الأمانة في الصحوبية إنك ما تستخدمش ضعف صاحبك او أسراره ضده يوم ما تختلفوا او تزعلوا او تتخاصموا مع بعض، الأمانه فى الصداقه إنك طالما بتحب صديقك وباقى عليه يبقى تقبله بكل أحواله وتستحمله فى كل أحواله وتكون دايما بتقدمله حب وواقف جنب وسانده وفى ضهره فى كل الاوقات.

*نوع كمان من أنواع الأمانة وهو الامانه في الخصام والزعل،
أيوا حتى في وقت الخصام والزعل لازم يكون في أمانة. بمعنى مش كل كلمة او سر يتقالوا وقت الزعل،
مش كل لحظة غضب وخناق نسمح فيها إننا نكسر صداقه وعشره سنين. الأمين في خصامه،
هو اللى مايشوهش صورة غيره وقت زعله،
وهو اللى مايحولش الخلاف والخصام والزعل لساحه حرل وأنتقام.

* نيجى بقى للأمانه في الشغل:
وهى إنك تقوم بشغلك بمنتهى الأمانه قدام ربنا حتى ولو مفيش حد شايفك، هى إنك ما تغشش وماتسرقش وماتستحلش حاجه هى مش من حقك حتى ولو كل اللى حواليك بيعملوا كده، الامانه هى إنك ما تاخدش مجهود غيرك وتنسبه لنفسك. الأمانة هنا هى مش خوف من مدير ولا رقيب ولا حد لكن هى خوف من ربنا، وإحترام لنفسك ولضميرك.

* نيجى بقى للأمانة في الكلام:
وهى الامانه فى كل كلمه تطلع مننا لازم تكون بمنتهى الأمانه لا تكون بالغش ولا بالكذب ولا بالرياء ولا بالنقصان ولا بالزياده تطلع بمنتهى الأمانه.
الأمانه مش كل حاجه تتسمع تتنقل ومش كل اللي يتعرف ممكن يتقال، في ناس ممكن تخون وتكون مش أمينه من غير ما تحس بمعنى
لما تنقل كلام بنية الفضفضة او لمجرد الرغى والتسليه ويكون الكلام ده ممكن
يكسر قلوب أو يخرب بيوت أو يوقع بين الناس وبعضها.

*عندنا كمان الأمانة في المجتمع:
وهى تعتبر نوع مهم من أنواع الامانه فى حياتنا بمعنى إن المجتمع مش هيتصلح بالقوانين بس لكن
هيتصلح لما كل واحد يسأل نفسه هو
أنا أمين فعلا فى دورى؟ بمعنى هلى انا أمينه
في دوري كأم؟ هل أنا أمين فى دورى كأب؟ هل اأنا أمين كصديقة او صديق كاصديق كأخ او أاخت؟ كأنسان عموما؟
الامانه هنا هى إننا لازم نكون أولا أمناء مع نفسنا عشان نكون أمناء مع غيرنا ومع كل اللى حوالينا وأمناء فى كل حاجه.
مع الأسف فى ناس فى وقتنا ده غير أمينه مع نفسها وبالتالى مع كل الناس اللى حواليها
بمعنى إنهم بيحاولوا يبينوا صوره مش هى الصوره الحقيقيه اللى هما عليها بيكذبوا ويضحكوا على نفسهم وعلى الناس والمصيبه إنهم بيصدقوا كذبتهم دى يعنى ممكن انهم يظهروا نفسهم بمظهر جميل ومتدين وخدوم وكل حاجه بيعملوها بتكون صح وده عكس تماما اللى بداخلهم واللى بيعملوه فى الخفاء.
الأمانة مع النفس هى إنك تعترف بضعفك،
وتواجه غلطك وتحاول،
تتغير وتعالج نقاط ضعفك.

في الآخر الأمانة هى مش مجرد كلمه بتتقال او نصحيه بتتوجه لكن هى إسلوب حياة.
لو اتزرعت صح بينا وبين ربنا، هانحصد نتيجتها في بيتوتنا وفي علاقتنا وفى شغلنا وفي حبنا، وفي خصامنا، وفي كلامنا، وفي كل خطوة بنخطيها
لأن اللي أمين مع ربنا وبينه وبين نفسه إستحاله يبقى خاين فى أى حاجه مهما إن كانت.

“بقلم ياسمين شفيق”