خسارة بعض الناس ..  لما تكون خسارة بعض الناس هي المكسب الحقيقي…

بقلم – ياسمين شفيق

في حقيقة الأمر، في أوقات كتير خسارة بعض الناس اللي موجودين في حياتنا بتكون مكسب لينا ومن رحمة ربنا علينا.

أوقات بيدخل في حياتنا ناس وهم لابسين ثوب الحملان، والمحبة، والوداعة، والأخلاص، والصدق، والحنية،

وفي الحقيقة هما من جواهم ذئاب مليانة كذب وخداع وغش وخيانة.

الناس اللي زي دول، البعد عنهم أحسن حاجة، ورحمة من ربنا،

وما يتبكيش عليهم أبدًا.

ما تبكيش على شخص خرج من حياتك بمزاجه. عارفة إنه هيكون صعب عليك وهيصعب عليك نفسك ومشاعرك والعشرة والذكريات والأوقات الحلوة،

بس خلينى أقولك حاجة مهمة:

الزعل على شخص بايع مضيعة للوقت.

الشخص الكذاب ما يتزعلش عليه،

الشخص الخاين ما يتزعلش عليه،

الشخص اللي يسيبك في نص الطريق ويمشي ما يتزعلش عليه،

الشخص الأناني اللي شايف مصلحته وبس ما يتزعلش عليه،

الشخص اللي حبه كان كلام من غير أفعال ما يتزعلش عليه،

والشخص اللي تهون عليه العشرة ما يتزعلش عليه.

وأكررها تاني وتالت وعاشر:

الشخص الخاين، والغشاش، والكذاب…ما يتزعلش عليه أبدًا.

الناس اللي زي دي لما تخرج من حياتك، المفروض تحمد ربنا إنه كشفهملك بدرى،

قبل ما عمرك يضيع وإنت مغيب عن حقيقتهم.

خسارة الناس دي، صدقنى في الحقيقة مكسب ليك ونعمة من ربنا من نعم ربنا عليك.

إصحي بقى وإجمد،

مش دول الناس اللي يتزعل عليهم.

إنت مقامك أكبر من كده بكتير،

وزعلك غالي قوي عند ربنا،

خلي زعلنا بس على الناس اللي تستاهله بجد.