الحدود الصحية وسر العلاقات القويه وأهميه الحدود في أي علاقة
بقلم ياسمين شفيق
كلنا أكيد عندنا علاقات زى العلاقات العائليه والحب والصداقه والشغل إلخ. وأكيد كلنا بنحب الناس ونحب نكون قريبين منهم بس ساعات قربنا بزيادة ممكن يسبب مشاكل وهنا بيظهر دور الحدود الصحية وأهميتها فى العلاقه وده مش معناه بناء جدار بينا وبين الناس، لكنها طريقة تحمينا وتخلي علاقاتنا
أقوى وأصدق ومملوءه بالود والأحترام.
الحدود مش قسوة ولا هى حاجز بينا وبين الناس لكن هي حاجه مهمه جدا لحمايه نفسنا وللحفاظ على علاقتنا لما فعلا نعرف نستخدمها صح.
ليه الحدود الصحيه حاجه مهمه فى حياتنا؟
– لأنها بتحمي طاقتنا ومشاعرنا من حاجات كتير منها الأستنزاف فى المشاعر او الطاقه ، أو الجرح اللي ممكن ييجي بقصد او بدون قصد.
– لأنها بتخلي الناس تعرف قيمتنا ويحترمونا ويقدروا وقتنا ومشاعرنا
– لأنها بتقوي العلاقات جدا وده لأن الغموض والضغط وتخطى الحدود بيضعف أي علاقة والوضوح بيخليها صادقه أكتر ومستقره.
وهنا يجى سؤال مهم وهو إيه هى العلامات اللى تقول إن العلاقه دى محتاجه إن نحط ليها حدود؟
العلامات دى هى :
– إنى أكون دايمًا حاسس إنى مرهق أو مستنزف.
– إن فى حد بيتعدى على راحتى وكلامى أو مشاعرى.
– إن لما أقول كلمه ” لأ ” اشعر بالخوف او الذنب.
طيب إزاى نعرف نحط حدود صح؟
أولا..إن نعرف نفسنا الأول يعنى نعرف مشاعرنا وأحتياجاتنا وإيه اللى يريحنا ويريح قلبنا وفكرنا.
ثانيا..نتواصل بوضوح وبمنتهى الصدق مع الطرف الاخر فى العلاقه وحتى لو جه وقت علينا وإضطرينا إن نقول للعلاقه دى” لأ ” وقتها ده هايكون مفيد جدا ومريح لينا وللآخرين.
ثالثا. الثبات المستمر فى الحدود لأن الحدود اللي تتغير كل يوم بتعمل ارتباك وتوتر وعدم راحه.
رابعا.. إحترام حدود الآخرين بمعنى إن كل علاقة صحية لابد إنها تكون مبنيه على الأحترام المتبادل، مش طرف واحد بس هو اللى يقدمه.
ومن هنا نيجى نقول إن الحدود مش بُعد لكن هي فعلا حب حقيقي وصادق
كتير من الناس تفكر إن لما نحط حدود فى علاقتنا ده معناه ابتعاد. لكن الحقيقة هى إن الحدود بتخلي الحب أقوى والترابط اقوى والعطاء أكثر، والأحترام متبادل.
لما كل طرف يعرف مكانه ومساحته، العلاقة بتقوى وتكبر وتزداد بدل ما تنهار.
نصيحه منى ، ماتضحيش بنفسك عشان تحافظ على أي علاقة. أى إن كانت الحب الحقيقي والترابط الصحيح ما بيحتاجوش حد يتجاوز حدوده. إتعلم تقول “لا” من غير خوف ولا شعور بالذنب. حافظ على حدودك بدون إحراج او خجل حافظ حدودك بمنتهى الامانه والصدق والحب وكل ده عشان تحمي نفسك، وتحمي كل علاقة عزيزة وغاليه عليك.
