يارا حمدي صالح ترثي شقيقها طارق

كتبت .. يارا حمدي صالح

اربعين يوم يا طارق والوجع مابيقلش

اربعين يوم و لسه بعيط كأنه امبارح

اربعين يوم و لسه بحس انه كابوس

اربعين يوم بجري و بتلهي في اي حاجة عشان استخبى

اربعين يوم من التخبط و العزلة الكبيرة

اربعين يوم و انا حاسة شايلة حيل جوه روحي مابيروحشي

اربعين يوم، و بدأت اطلع وجعي بس و انا لوحدي

اربعين يوم و١٠٠ الف سؤال و لا عارفة الاقي ليهم اجابة واحدة ..

اربعين يوم كبرت فيهم و لا ١٠٠ سنه

اربعين يوم اتغيرت فيهم شكل الدنيا في عينيا

اربعين يوم حاسة ان احساس الحب جوايا حصلي فيه تشوه

الناس بتبعت تقولي ارجعي، و قومي و خليكي قوية ..

ناس كتير بتحاول تبقى موجودة

عشان كده انا عاوزة اعتذر اني مش دايما برد…او كتير مش برد

عاوزة اعتذر اني متقلبة المزاج بشدة الفترة دي و كمان عصبية

عاوزة اعتذر اني مش عارفة ارجع ليارا المبهجة ايقونه التفاؤل

عاوزة اعتذر اني مش قادرة التزم باي وعد او اي حاجة ..

عاوزة اعتذر لاي حد مستغرب او مش فاهم ليه كل ده

اللي اقدر اقوله

ربنا ما يوريها لحد

والله من قلبي

ربنا ما يوريها لاي حد