الطريق للكتابة مش بس ورق وحبر
الطريق للكتابة مش بس ورق وحبر
كتبه محمد الحديدي
ده مشوار طويل… يشبه البحر لما يهيج ويمطر
تبدأ بحرف تايه… وسطر بيجري من غير معنى
وتقعد تفكر: “هو أنا هعرف؟ ولا الحكاية دي مش ليا؟”
تقوم تقول لنفسك: “جرب… يمكن تلاقيك”
تلاقي قلبك بيحكي… والكلمة طالعة وراك
تكتب من جرح… ومن فرحة… ومن ذكرى بتضحّك
وتحس إن القلم صاحب… مش أداة في إيدك بتتحرك
ليالي سهَر… تنام والدفتر مفتوح
وإيدك لسه في الهوا بتكمّل اللي الروح قالته بروح
تتخانق مع جملة… وتتصالح مع جملة تانيه
وتلاقيك كتبت صفحة… من غير ما تحس بثانية
يوم تنجح… ويوم تقع… ويوم تقوله “كمل”
وتتعلم إن النجاح مش وصول… النجاح إنك تكمل
وإن الكتابة رزق… يجيلك بس لو قلبك حاضر
وإن الكلمة طفل… محتاج صدرك عليه يتساهر
وتبدأ الناس تقرا… وتقول: “الله… ده الكلام جميل”
تضحك… بس جواك عارف إن ورا الجمال تعب طويل
تعب ليالي وسنين… وتجارب مرة وحلوة
وحدوتة كتبتها بدموع… وحدوتة كتبتها بروح مسحوبة
لحد ما تيجي لحظة… تشوف فيها اسمك عالي
تقول: “ياااه… ده أنا مشيت كتير، ومشوار لسه في باقي”
وتعرف إن الرحلة لسه… وإن النجاح مش محطة
ده طريق… كل يوم بتكتب فيه خطوة بخطوة
وتفضل ماشي… وقلمك صاحي… ودنياك بتتحسن
طالما فيك نفس… هتكتب
وطالما فيك حلم… هتوصل
وطالما قلبك بينبض… هتفضل كاتب…
ولو الدنيا كلها اتغيّرت…
الكلمة منك عمرها ما هتروح ولا تهون.
