كلنا موجوعين… بس محدش يعرف وجع حد غير صاحبه

بقلم ياسمين رشدى

😪😪كلنا موجوعين

كلنا موجوعين… بس محدش يعرف وجع حد غير صاحبه

أصعب وجع هو اللي بنعيشه لوحدنا فى صمت

وجع محدش بيشوفه عشان إتعودنا إن لازم نخفيه ونظهر قدام الناس متماسكين ومش ضعاف.

، نضحك ،نهزر ،نخرج ، نحتفل بمناسبات، ننزل صور على السوشيال ميديا. ومع الأسف كل ده يبين أد إيه إحنا فرحانين ومبسوطين ومفيش حد زينا وربنا هو بس اللى شايف اللخبطه والتعب والوجع اللى جوانا وفى حياتنا.

وتيجى بقى الناس تشوف الصوره كده من برا تقول يااا سلام عليهم يابختهم دوول عايشين أحسن عيشة مش شايلين هم حاجه ياريتنا نعيش زى عيشتهم ونبقى مرتاحين وفرحانين زيهم.

لكن الحقيقة؟

إن في ناس وهى بتعمل كده بتبقى بتموت من جواها

كل يوم.

تعيط كل ليله ودموعها تغرق مخدتها من الحزن والوجع والكسره والقهر لحد ما تنام من كتر التعب من العياط، والناس دى ممكن يجيلها امراض صعبه بسبب

الالام النفسيه اللى بيعانوا منها ومحدش حاسس بيهم.

ومع كل المعاناه دى تلاقيهم يصحوا الصبح لابسين قناع القوة والتماسك،

ويكملوا يومهم كأنهم بخير وزى الفل

وهم أصلاً مش قادرين يشيلوا نفسهم ولا قادرين يقفوا على رجليهم.

الإنسان الموجوع أوقات بيبقى تعبان لدرجة إنه مش قادر يشرح ولا قادر يعبر ولا قادر يتكلم ولا قادر يقول ساعدوني انا تعبان من جوايا.

الانسان الموجوع بيتمنى بس إن حد يحس بيه من غير ما يتكلم، حد يطبطب على وجعه، حد يقوله انا حاسس بيك وبتعبك ووجعك ،

حد يفهم تعبه من صمته مش من كلامه، حد يحتويه وقت انهياره وعصبيته وغضبه، حد يقوله مهما عملت انا بحبك وهافضل جنبك مش هاسيبك ابدا، حد يطمنه ويطبطب على اوجاعه ويشفيهاله

الشخص الموجوع محتاج حد يكلم ربنا عنه مش يكلمه هو عن ربنا ويوعظه.

الانسان الموجوع بيبقى وقت الوجع مش مستحمل وعظ بالكلام ولا نصايح وكلام كتير لكن بيكون محتاجك انت نفسك تكون وعظه ليه بالأفعال محتاج منك طبطبه واحتواء وحضن يضمد جراحه.

ويا سلام لما إحنا في وقت انهيار الشخص ده

نكلمه من غير سبب ونسأل على احواله او نبعتله مسج من قلبنا نقوله عامل ايه طمنا عليك.

وقتها يمكن ده بيكون طبطبه ربنا على قلب الشخص الموجوع المهموم المكسور

كأن ربنا بيقوله أنا شايف دموعك اللي محدش شايفها وشايف اوجاعك والامك وكسره قلبك اللى محدش حاسس بيها.

في اللحظات دي، الموجوع بيكون محتاج حاجات بسيطة اوى

مش محتاج لاحلول ولا كلام كبير ولا حد يلومه على انهياره وضعفه. هو بس محتاج حضن، محتاج كلمة، محتاج اهتمام حقيقي، محتاج احتواء، محتاج طبطبه، محتاج حنيه، محتاج حب، محتاج حد يقوله أنا حاسس بيك وهافضل موجود جنبك مش هاسيبك ابداً

يا ريت

ربنا يبعت لكل موجوع حد يحتويه،

ويضمد جراحه والامه ومايسيبهوش ينهار في صمت

ويا ريت إحنا كمان نتعلم نكون الطبطبة لغيرنا

يمكن كلمة مننا تنقذ قلب حد بيقع ومحدش واخد باله.

في الآخر…

كل واحد فينا بيخوض معركة محدش شايفها وربنا بس

هو اللى شايفها،

وفي عز الوجع كل اللي محتاجينه حد يفهم

ولو حتى بدون كلام

مشاعر ياسمينيه