حديث هادئ مع النفس .. عن إيه هى الحاجات اللي لو رجع بينا الزمن ممكن نغيرها.
بقلم ياسمين شفيق
أوقات كتير بنقعد مع نفسنا في لحظة هدوء ونفتكر مواقف فاتت وناس عدوا علينا وطرق كتير مشينا فيها ونسأل السؤال اللي اكيد بييجي فى فكر كل واحد فينا وهو: لو الزمن رجع بينا كنا هنعمل نفس اللي
عملناه واتصرفنا نفس التصرف واختارنا نفس الاختيار؟
وبين التفكير والسؤال والجواب بيحصل حوار صادق جدا بينا وبين ونفسنا حوار جايز يكون مؤلم لكنه حقيقى.
لو الزمن رجع بيا تانى؟…
كنت هسمع لقلبي أقل، وهسمع لعقلي أكتر.
وده مش عشان إن القلب غلط والعقل صح لكن لأن القلب كان اوقات كريم زيادة عن اللزوم وصدق ناس مكنش ينفع يصدقها، ناس مش أد الحب ولا أد المشاعر اللي اتقدمِت لهم وعشان أوقات قبل بحاجات ورضى بيها مكنش ينفع انه يقبل او يرضى بيها وقتها.
لو الزمن رجع بيا تانى؟…
كنت هحافظ على نفسي من الافراط الزياده فى كل شئ بمعنى،
مش هدي وقتي لكل الناس،
ولا طاقتي لكل اللي يطلب. ولا كل حبي ومشاعرى لكل اللى يدخل حياتى لكن
كنت هسيب شوية من نفسي لنفسي.
لو الزمن رجعبيا تانى…
كنت هقول كلمه لأ بدري،
بدل ما كنت استنى لحد ما أتعب وأتوجع ،
أو لحد ما أكتشف إن سكوتى كان ثمنه غالي أوى.
لو الزمن رجع بيا؟…
مكنتش هزعل على اللي مشي وطلع من حياتى،
ولا كنت هتعلق بكل اللي ضحكلي ولا كنت هاصدق كل اللى قرب منى.
وكنت هفهم بدري إن مش كل الناس اللى بتدخل حياتنا بتدخل عشان تبقى معانا…لكن في ناس بتدخل عشان تعلمنا دروس صعبه.
لو الزمن رجع بيا تانى ؟…
كنت هختار نفسي في مواقف كتير.
وكنت هريح قلبي من علاقات ماكنتش ليا،
وكنت هبعد عن أماكن ماكتش تناسب شخصيتى ولا روحي.
كنت هسامح نفسي أكتر،
وألوم نفسي أقل.
بعد الحوار الهادئ ده مع نفسي وبعد كل الاسئله دى اللى دارت بينى وبين نفسي اكتشفت الحقيقه وهى ان
الزمن ما بيرجعش تانى واللى حصل حصل لكن
إحنا بس اللى بنكبر.
بنكبر بمواقفنا، بخسارتنا، بفشلنا، وبالوجع اللي عدى علينا.
بنكبر وبنكتشف ان اللى فات شكلنا
واللي اتغير جوانا هو اللي خلانا واقفين النهارده بصمود وبنضج اكتر، وهدوء اكبر، ونظرة أعمق للحياة.
يمكن لو الزمن رجع بيا كنت هغير حاجات كتير
بس يمكن لو الحاجات دي ماكنتش حصلت،
مكنتش هبقى الأنسان اللي بقيت عليه دلوقتي.
فبدون ندم ولا لوم
أنا ببص لنفسي دلوقتى وبقول وأنا فخوره :
أنا مش محتاجة الزمن يرجع تانى أنا محتاجة أكمل حياتى بعد كل التجارب دى وأنا فخوره بنفسي وواعيه وفاهمة، واهدى اكتر ونفسي وروحى متصالحين مع كل اللي فات.
إمضاء
أفكار ياسمينيه
