ياسمين شفيق تكتب: بطل تتعشم في الناس
التوقعات هي أول باب للوجع. خليك دايما محضر نفسك إن مش كل وعد هيتنفذ ومش كل كلمة هتتحقق. لو حصل خير قول اشكرك يارب ولو ماحصلش ماتزعلش وماتتكسرش.
بطل تستنى من حد انه يسأل عليك.
اللي فاضي ليك هايجى يسأل من غير ماتطلب منه واللي مشغول عنك أو انت مش على باله اصلا ما تستناش منه اهتمام . اعتبر سؤاله لطف منه مش واجب.
بطل تعاتب.
فعلا العتاب بقا وجع زيادة حتى مع الناس القريبه جدا على قلوبنا. اوقات كتير الرد اللي بناخده منهم بيوجع اوى وبيكون أقسى جدا من سكوتنا ووقتها نقول ياريتى ما اتكلمت او عاتبت. خلي كرامتك أهدى من كده وسكاتك اذكى
بطل تزعل من الناس.
عشان زعلك مش هايكون غالي عند كل الناس وممكن اصلا مايفرقش معاهم وكمان رضاهم مش لازم ييجي على حسابك. اهم حاجه انك تصفى جواك مع نفسك ومع ربنا وتوفر دموعك وحزنك للي يستاهل ويستحق.
بطل تطلب من حد إلا لو للضرورة القسوى .
لإن كل طلب وراه تمن. ومش كل الناس بتدي من غير مقابل ومش كل الناس اصلا هاترضى تساعد وتدى خليك واقف على رجليك وخلي احتياجك ده اخر اختيار واكيد ربنا هو اللى هايبعتلك الشخص المناسب اللى هايساعدك.
بطل تدور على حد يسمعك.
اللي بيسمع بجد بقى عملة نادرة. كل الناس عايزة تتكلم ومحدش فاضي يسمع. اللى بيسمع بقى قليل اوى فى الزمن ده لكن دايما الجئ لربنا هو اللى هايسمعك. وهو اللى هايحتوي نفسك وهو اللى هايطبطب عليك .اوعى تستنى ده من حد.
بطل تطول فى القعدة.
خف على الناس، وخف على قلبك. امشي في الوقت اللي يشيل لك قيمة. مش الوقت اللى يطفش حد منك. جمله يابخت من زار وخفف عمرها ما كانت غلط. اوقات الدخول اوى فى اى علاقه بيسبب مشاكل وزعل احسن حاجه وضع الحدود فى التعامل وفى كل شئ لحمايه نفسنا .
.الكلام ده مش قسوه لكن ده حماية لقلوبنا من الوجع.
