يارا حمدي صالح تكتب: عفوا لقد نفذ رصيدكم

عفواً، لقد نفذ رصيدكم !!

الكلام ده هيزعل ناس كتير، لانه جي كاشف لحقيقة سخيفة جدا غالبيتنا بيغض الطرف عنها ..

المشاعر ليست ابدية او مضمونه،
حتى الجواز نفسه ليس بضامن لاستمرارها
المشاعر كائن حي غير مرئي، عشان يفضل عايش محتاج تفاصيل رعاية كتيرة جدا

بندعي ربنا كتير و نقول
” يا رب ثبت قلوبنا على حبك!!” ، يبقى ليه شايفين روحنا اهم او اعظم من الذات الالهية !!!

المشاعر اول ما بتتولد،
بتخلق جوانا رصيد للشخص اللي بنحبه، و من بعدها، افعاله هي اللي هتحدد المشاعر دي هتروح على فين

اللي شفته في عمري و في تجارب كل اللي حواليا ان الحب بيخلص لو تم التعامل معاه باغبى نظرية
نظرية ” الضمان ”
ده اول مسمار في نعش اي علاقة انسانية …
احساس ثقة ليس له اي تفسير يتملك من شخص و يرتكن اليه بمنتهى اللا مبلاه و من ثم ييدأ يعامل الطرف التاني باهمال متكرر و من ثم يبدا طريق الخسارة
بديهي مش هينفع طرف واحد بس يفضل طول الوقت
مادد ايده و ماسك في الطرف التاني
بعد شوية، هيتعب، هيزهق، هيتوجع
فهيمشي ..

الاهمال و عدم سماع شكوى الطرف التاني و التململ منه و من شكواه، كل ده لانه داخليا بقى في تصور انه مش هيمشي او
ان خسارته تتلحق..
و لكن !!!، زي ما بدأت كلامي
حتى الجواز مش ضامن لاستمرار المشاعر !!

مشكلة المشاعر انها لا ارادية..
انت لا تقدر تزقها لقدام عشان تكبر
ولا تقدر ترجعها و تشدها للخلف عشان تخلصها !!
هي بتستجيب جدا لشكل الرعايا اللي بيتقدم لها بشكل تراكمي و مش بشكل لحظي …
عشان كده بقى في ستات متجوزة بتخون
و وفقا لتحليل سيكلوجية المرأة و اراء دكاترة نفسيين انا بثق فيهم جدا، المرأة ليست كائن خاين بطبعه !!
و مش قصدي هنا انها تنجرف لفعل الزنا،
ولكن مجرد انخراطها في مشاعر لشخص تاني حتى لو بينها و بين نفسها
يعد درجة من درجات الخيانه

و اذا بدأنا نتأمل الست دي و لقيناها ست معروف عنها انها محترمة و ذات سمعة طيبة
و اذا بدأنا نعرف انها حاولت كتير توقف جوزها و تقوله بكل الطرق انها محتاجة له و لازم ياخد باله منها !!
و اذا عرفنا انها استحملت منه كتير
و اذا افتكرنا ان ربنا مش حايحاسبنا على اللي بنحسه
او اللي لسه بيدور جوة نفوسنا و لكن حايحاسبنا على بس اللي بيطلع مننا من افعال !!
يبقى انا معرفش الست دي ملامه و لا لأ !!!..

انا مش بتكلم بنموذج الست عشان عاوزة ابقى مستفزة
و لا لاني ست و بدافع عن الستات
اطلاقا، انا بحاول اروح لاكتر صورة متطرفة عشان اوصل قد ايه ان المشاعر مش مضمونه ..

الضامن الوحيد للمشاعر هو ” الاستمرارية ”

اسمرارية التواصل الانساني و عدم الارتكان لفكرة ” ما هو موجود مش هيمشي ”
استمرارية تقديم حد ادنى من الاهتمام و عدم الارتكان للحجج و الظروف…
استمرارية التطور عندي انا و شريكي في نفس المحور
…لان لو واحد سبق و التاني فضل مكانه، العلاقة هتموت بالحياة ..
استمرارية الصراحة و الفضفضة .
..لان الشيل تحت السجادة بيكون عفن لازم هيجي عليه يوم و يقتل العلاقة ..

الرصيد الموجود جواك لشخص ما مستحيل يفضل ثابت،
لازم بالوقت يا هيزيد يا هيخلص ..
.و ده غصب عنك برضه، انت هنا مشاعرك مجرد رد فعل ..

فاحذر ان تتعامل مع من تحب بعجرفة او اهمال ..
سيأتيك يوم و تتلقى رساله

” عفوا، قد نفذ رصيدكم ”

يارا حمدي صالح
الدروشة