أسماء جلال: حياتي خط أحمر.. ومش بخاف من الانتقادات ولا من الجرأة
كتبت: منار مختار
في حوار صريح مع الإعلامية لميس الحديدي ببرنامج “الصورة” على قناة النهار، فتحت الفنانة أسماء جلال قلبها وتحدثت عن الانتقادات اللي بتواجهها سواء بسبب أدوارها الجريئة أو حياتها الشخصية.
وقالت أسماء جلال “الناس كده كده هيفضلوا في حياتنا، سواء رافضين أو قابلين.. المهم كل واحد يخليه في حاله.”
وأكدت إنها ما بتسمحش لأي حد يتدخل في حياتها، مضيفة:”أنا مبحكمش على حد، ومبحبش أتدخل في حياة أي شخص، وبطلب نفس الشيء.. حياتي خط أحمر”.
عن فيلمها الجديد “فيها إيه يعني”
عبرت عن فخرها بفيلمها الجديد “فيها إيه يعني؟”، وقالت” إنه بيحكي قصة قريبة من الناس ومن واقع المجتمع المصري”.
وأضافت: “العمل بسيط لكنه بيحمل رسالة قوية، وكل شخصية فيه هتلمس الجمهور بطريقة مختلفة.”
شخصية متسلطة… لكن بقلب طيب
كشفت أسماء جلال إنها بتجسد في الفيلم شخصية امرأة متسلطة، لكن بدوافع إنسانية مش سيئة، قائلة: “هي مش متسلطة بمعنى وحش، هي بس بتخاف على اللي بتحبهم وبتحاول تحميهم.”
وأوضحت إن الشخصية دي شبهها جدًا، خصوصًا في علاقتها بوالدها الراحل، وقالت:”كنت بخاف عليه جدا، وكنت لازم أوصله الشغل قبل الجامعة، وكنت بغير عليه جدا… الله يرحمه خلص مني.”
ليه بطلت تخاف
أوضحت أسماء جلال إنها اتعلمت تسيب الأمور على ربنا بعد تجربة شخصية، وقالت: “كنت بخاف على الناس زيادة عن اللزوم، بس فهمت إن اللي مكتوب لازم يحصل، فبطلت أعيش في رعب.”
“فيها إيه يعني” مش بس فيلم.. ده أسلوب حياة
أكدت أسماء إن اسم الفيلم بيعبر عنها، وإنها بتعيش حياتها ببساطة وحرية، وقالت: “أنا بطبق المبدأ ده طول الوقت.. ومش شايفة ده جرأة، دي حرية شخصية، لو عايزة أسافر أو أعمل حاجة هعملها.”
