الاء فرغلي فوزي تكتب: “تجربة بتكلفك عمرك”
في ناس كتير بتفتكر إن تجربة المخدرات مرة واحدة “مش هتضر”، أو إنها مجرد فضول ممكن يعدّي. بس الحقيقة إن التجربة دي مش مجرد لحظة، دي بداية طريق للهلاك.
أول مرة مش بريئة.. أول مرة هي البوابة اللي بتسحبك لورا من غير ما تحس.
الإدمان مش بيقف عند شخص واحد.
ده بيدمر عيلة كاملة.
اللي بيجرب عشان ينسى همومه، بيضيف هموم أكبر لأهله.
أب أو أم يفضلوا صاحيين الليل كله بيدعوا ربنا ينقذ ابنهم.
أطفال ممكن يلاقوا نفسهم في يوم من غير أب يسندهم ولا بيت آمن يحميهم.
أكتر حاجة توجع لما تسمع قصة شاب متفوق، كان عنده حلم وموهبة، ضاعوا في دخان أو في شريط صغير او في انواع تانية كتير.
والوجع الأكبر لما تلاقي أم بتكلم نفسها: “ابني كان أحسن من كده، فين راح؟”.
المخدرات مش بس بتهدّ الصحة.. بتسرق الكرامة.
اللي بيدمن ممكن يعمل أي حاجة عشان الجرعة: يبيع نفسه، يخسر شغله، يخسر احترام الناس، والأصعب.. يخسر احترامه لنفسه.
لازم نفهم إن مفيش حاجة اسمها “أنا مسيطر” أو “هعرف أوقف في أي وقت”.
الإدمان مش بيديك فرصة تختار. هو بياخد منك الاختيار من أول خطوة.
وإحنا كأصحاب وأهل وجيران، مسؤولين إننا نقول “إوعى”، ونفكر اللي حوالينا إن التجربة مش شطارة ولا رجولة.. دي انهيار.
اللي عاوز يثبت نفسه يثبتها بالنجاح، بالعلم، بالشغل، بالكرامة.. مش بحاجة تدمره وتكسر اللي حواليه.
وأكبر رسالة لازم تفضل في دماغنا:
أول مرة.. ممكن تبقى آخر مرة.
واللي بيبعد عن الطريق ده، بيحمي نفسه، وبيحمي بيته، وبيحافظ على مستقبل لسه قدامه.
