شوف أرقام التمويل دى لـ”أوكرانيا” مقارنة بـ “افريقيا”.. واعرف الحقيقة المرة

المعونات اللي قدمها البنك الدولي لأوكرانيا من بداية الحرب فبراير 2022 وصلت لحد النهارده 81 مليار دولار.

المعونات اللي قدمها البنك الدولي لإفريقيا.. بحالها ومحتالها في الفترة دي 44.2 مليار دولار..

تعداد أوكرانيا 39 مليون نسمة

تعداد إفريقيا 1550 مليون (1.55 مليار) نسمة

واخد لي بال حضرتك من الفرق؟!

مساحة أوكرانيا 600 ألف كيلومتر مربع

مساحة إفريقيا 30.3 مليون كيلومتر مربع (قد روسيا مرتين يعني بالصلاة عالنبي)

حضرتك فاهم الأرقام دي ومدلولاتها؟

بس علشان لما حد يقول لك إن روسيا المعتدية الغدارة الخاينة الوحشة المتوحشة بنت الكلب طلعت على أوكرانيا الغلبانة المسكينة ف صباح يوم أغبر علشان المعلم بوتين مزاجه ما كانش حلو تفهم إن ده كلام فاضي..

ده حضرتك إحصائيات البنك الدولي بس لا جينا ناحية صندوق النقد، ولا ناحية المساعدات الأمريكية ولا الأوروبية، ولا جينا خالص خالص ناحية المدافع والدبابات والمدرعات والأسلحة والذخيرة.. دي موال تاني خالص.

قوم لما حد يقول لك إن أصل أوكرانيا “بتحارب”.. لأ حضرتك مش أوكرانيا اللي بتحارب، اللي بتحارب أوروبا والناتو والولايات المتحدة، واللي بيحارب المستعمر القديم اللي شفط مننا جميعا في إفريقيا وآسيا وأمريكا اللاتينية مواردنا وأهالينا علشان يعمل النهضة التكنولوجية العظيمة اللي كلنا بنستفيد منها النهارده ما قلناش حاجة، ولما جينا نتحاسب قال لك: خد دول مشي حالك بيهم وتمام. كده خالصين يا معلم..

ولما جيت تطلب منه علشان التعليم والبنية التحتية والفقر والجهل والمرض.. قال لك: أسلفك بس بالفايدة وتدفع على أقساط.. ومن ساعتها واحنا كلنا متداينين لذات نفس المستعمر القديم اللي أصلاً أصلاً لحم اكتافه من خيرنا جميعاً.

إنما لما أوكرانيا وإسرائيل يطلبوا، واحدة علشان تقرم روسيا من لا مؤاخذة وتستنزف مواردها، والتانية علشان تسيطر على الشرق الأوسط وتبقى ذراع الغرب في أغنى منطقة في العالم، يفتحوا الخزاين على البحري ويدفعوا وببلاش ومش لازم حضرتك ترجع الفلوس.. اعتبرها زكاة..

قووووم ساعتها تفهم تعبير المستشار الألماني فريدريش ميرتس لما بيقول لك على اللي عملته إسرائيل في إيران بإنها “بتقوم بالأعمال القذرة نيابة عنّا جميعاً”.. أي والله قالها كده ومثبتة ومتوثقة في تصريح رسمي فهمي نظمي..

إسرائيل وأوكرانيا بالفعل وبكل دقة هو ده اللي بيعملوه.. “الأعمال القذرة” نيابة عن الغرب النضيف المستحمي اللي ما يحبش يوسخ هدومه ولا يضحي بعياله.. قوم أوكرانيا وإسرائيل تعمل كده بالنيابة عنه.

إنما إفريقيا، غزة، أمريكا اللاتينية، آسيا..

والنبي شوية بس علشان الريحة..

صباحكم فل جميعاً