القاتل في ثوب الملاك كيف تكشف النرجسي المتدين وتحمي نفسك قانونيًا

بقلم المستشارة هدى الخضراوي

في كل محكمة وفي كل بيت بيتحاكم بالصمت وفي كل حكاية وجع فيها طرف واحد بيتكسر غالبًا هنلاقي ورا القصة دي شخصية نرجسية خفية
مش أي نرجسي لأ ده النرجسي المتدين المثالي اللي حافظ الدور أكتر من حفظه للدين نفسه

بيصلي ويؤذي
يصوم ويظلم
يتكلم عن القيم ويده ممدودة بالقهر
يتكلم عن حق الأبوة أو الزوجة وهو بيقهر اللي في إيده
والمجتمع ساعات يصدق لأن الصورة برا تلمع واللي جوه محدش شايفه

الوجه الخفي للنرجسية
النرجسية مش بس عنف واضح أو صراخ
في نرجسية مبتسمة بتهزأك وانت مش واخد بالك
في نرجسية هادية بتعزل الضحية عن العالم ببساطة تحت اسم الغيرة أو الحرص
الراجل النرجسي يوقف النفقة ويقول هي ناشز
الست النرجسية تمنع الرؤية وتقول الولد بيخاف منه
وفي الحالتين الأطفال هما الضحية والمحاكم بتتحول لساحة تصفية حسابات مقنّعة

بس القانون مش أعمى القانون صاحي
القانون المصري بدأ يفهم اللعبات دي خصوصًا لما الأوراق بتتكلم
وإنت كضحية عندك أدوات قانونية تحميك لو استخدمتها صح

في قانون الأحوال الشخصية
النفقة لا تسقط إلا بحكم ولو الزوج بيزوّر دخله تقدري تطلبي تحريات أو شهادة من جهة العمل أو البنك
الرؤية ليست فوق مصلحة الطفل ويجوز طلب وقفها لو ثبت الضرر
العلاج والتعليم نفقات عاجلة والمماطلة فيها نوع من الإهمال يعاقب عليه

في القانون المدني مادة مية تلاتة وستين
كل خطأ سبب ضررًا للغير يلزم من ارتكبه بالتعويض
يعني لو تم إيذاؤك نفسيًا أو ماديًا نتيجة سلوك النرجسي ليك دعوى تعويض

في القانون الجنائي
السب القذف التهديد نشر أسرار شخصية الامتناع عن تنفيذ حكم نفقة كلها جرائم قابلة للحبس أو الغرامة
أي تسجيل أو شهود أو رسائل ممكن تبقى دليل لو تم التعامل معاها صح

سواء كان نرجسي راجل أو ست الخطر واحد
اللي يلبس قناع الإيمان ويغدر
اللي يعيّش الناس دور الضحية وهو الجاني
اللي يعامل أولاده كأدوات انتقام
اللي يظلم ويطلب احترامه عشان صورته قدام الناس
ده مش شخص يستحق الشفقة ده شخص لازم يتواجه

رسالة لكل ضحية
ما تسكتيش
ما تسكتش
ما تعيشيش في الدور اللي رسمهولك النرجسي
اخرجي للنور وللمحكمة وللقانون
اجمعي مستنداتك
سجّل محضر
اطلبي تحريات
استخدمي أدواتك
وما تخافيش من المواجهة
لأن النرجسي بيترعب مش من الصوت العالي
لكن من الورق اللي بيفضح حقيقته قدام الكل

فاكر نفسه ملاك
أهو القانون جاهز يشيل له الجناحات المزيفة
ويكشف المجرم