المستشارة هدى الخضراوي تكتب: مين يقدر علينا

مين يقدر علينا
هي كلمة “مصريين” دي سهلة؟
ده اسم تقيل
اتكتب بدم الشهداء
واتحفر في قلوب الجدعان
لا اسمع بقى
أنا أقولك يعني إيه مصريين

يعني لما النيل يعطش
نحلف ما نرتويش غير مع بعض
يعني لما الحرب تدق الباب
نخرج كلنا، مسلم ومسيحي، بإيد واحدة وسلاح واحد

يعني لما العيد ييجي
الكنيسة تحط زينة، والجامع يوزّع كحك
ولما الضيق يشتد
نقفل على نفسنا الباب ونقعد نفكر لبعض في حلول

يعني لما شارع يولع
اللي يطفي النار واحد بلحية والتاني بالصليب
واللي يمسك ابنك لو وقع
ما بيسألكش انت بتصلي فين

يعني لما الدنيا تغلى
نقعد نضحك ونقول: “عدي يا بلدنا، إحنا معاك”
يعني الجدعنة
يعني الشهامة
يعني الأم اللي بتربي عيالها على “اللي جنبك أخوك حتى لو دينه مش زيك”

يعني الغيط اللي بنحرثه سوا
والمدرسة اللي عيالنا بيذاكروا فيها جنب بعض
والعَلَم اللي بنرفعه في نفس الطابور
يعني نحزن ونفرح ونخاف ونحلم سوا

يعني لو هتوقع مصري
لازم تعدي على تلاتين مليون مصري قبله
وحتى كده… مش هتعرف

إحنا المصريين
نقع، بس مانتكسرش
نختلف، بس مانكرهش
نتعب، بس مانسيبش بعض
وهنفضل طول العمر
درع لبعض
وسند لبعض
وعزة لبعض