دينا كرم الدين تكتب: الحب الحقيقي

فيه قرارات اتاخدت غلط لصالح ناس غلط ..اتكلمت حلو ولبست وشوش مزيفة وعرفت تمشي وسط الكل من غير ما حد ياخد باله لكن الوقت كفيل بعرى كل حاجة لأن الناس إلى كانوا سبب فى وجودهم نيتها حلوة وبتحب الصالح من قلبها… بس لما بتصدق اللي حواليها أكتر وبتسيب إحساسها ليهم بيكون الثمن غالي اوى لأن مش كل اللي بيضحكلك نضيف ومش كل اللي بيهز راسه معاك ويقولك (انت صح )وعايزاك الخير..

اللي بيفرق دايماً هو الوعي هو الفهم العميق هيا العين اللي مش بتتخدع مهما كان البريق اللي قدامها وهمي ..الحب الحقيقي مش كلام ولا شعارات الحب الحقيقي إنك توقف وتقول لأ ….لما الغلط يحصل حتى لو الكل ساكت حتى لو اللي حواليك شايفينك بتبالغ في رد فعلك وكلامك …

فيه أوقات لازم الصوت يعلى فيها مش علشان ننتقد لكن علشان نحافظ على اللي بنحبهم علشان نحميهم من ناس ممكن تلمعهم فى الاول وتسرقهم وتمشي وتغرقهم وفى الاخر ويعملوا نفسهم يا عينى مغلوبين على امرهم وشرفاء وأنقياء اوى ويقولك (أنا عبد المأمور) لا يا باشا المأمور اداك مهام تصلح مش تخرب مش توصل غلط على هواك وثق فيك وفى معرفتك وفكرك اهل للثقه ..

المأمور كان عايز يكبر مش يصغر المأمور كان عايز الصالح العام انت عايز الصالح الشخصى المأمور فاهم كويس ان الغلط اخرته خراب ولكن فى غفله بيثق فى معدومى الثقه والضمير وفى الاخر يواجهه لوحده الداهيه والكارثه كلها. اللى صنعتوها اللي فاكر إن المجاملة هي الحل بيهرب من الحقيقة واللى شايف إن السكوت أمان هو نفسه اللي حيصحى يلاقي اللي حواليه وقعوا من غير صوت …

كفاية تكرار بأه كفاية تصفيق للغلط كفاية وشوش مش حقيقية بتتصدر المشهد وهي أصلا كانت السبب في التعثر والشحن السلبى كفاية وقتنا أغلى من إننا نضيعه وسط دايرة مقفولة مش هنمشي تانى ورا الناس لمجرد إنهم مناظر كذابه إحنا هنمشي ورا ناس فاهمه وعقلهم صاحيه ونيتهم صادقه وصافيه من جواهم إحنا مش ضيوف على هنا إحنا أصحاب الحكاية كلها واحنا اللي لازم نكملها صح ونكتب نهايتها بإيدينا مش بأيد اللي كانوا بيداروا الشمس علشان يظهروا اللى تفضل صورتهم واضحة .

النجاح عمره ما بييجي صدفة ولا الغلط بيحصل من غير سبب دي حاجةاتعلمتها من اللي فات وشوفتها بأم العين على مر الوقت. علشان المكان اللي جوانا ليه حكاية كبيره مش بنموت فيه مهما تعبنا وتبهدلنا من اغبياء فاهمه الدنيا غلط وحسباها حسبه تودى فى داهيه .ومهما مريت بظروف صعبة اوى هيفضل جواك الاصل الماده الخام بتاعتك اللى اتأسست بيها واسست بيها كل دا وده اللي بيخليك تستاهل فرصة تانية بجد تكون أصدق وأنضج علشان الطريق لبكرة مش محتاج كلام كبير الطريق محتاج ناس شايفة وفاهمة كويس وعندها خبره وبتعرف تقول لأ للغلط والعشوائية والتجاهل اللى حتمياً بيضيع الدنيا كلها وفوق كل دا (((الكبر )))))

التواضع مش غباء ولا تقليل أبدا دا بيخلى كل حد حاسس إنه مش لوحده وإنه مهم وإن رأيه ليه قيمة في وقت من الأوقات كان في ناس بتتكلم بصوت أعلى من الحقيقة وكان في محاولات تخلي الناس تبعد عن اللي شايفينه وتحس إنها غلطانة علشان بس الصورة تفضل شكلها حلو لكن النور عمره ما بيستخبى ومهما اتأخر بييجي …

الناس الواعية مش خطر الناس الواعية هم السند الحقيقي لأي مكان عايز يكبر بجد وبصدق وعايز يثبت نفسه من غير تزييف وتلويين ومجامله مش لازم نفضل نطبطب على نفس الغلط كل مرة ونقول معلش يا بشر السكوت مش دايماً حكمة و المواجهة مش دايماً خصام أوقات بيكون لازم تقف وتقول كفاية علشان اللي جاي يبقى أنضف وأوضح وأحق بالأمانه اللى هيشيلها وعارفين ليه؟ لإننا إحنا مش عابرين سبيل لأ إحنا الأصل إحنا اللي كنا هنا من الأول وإحنا اللي هنفضل نحمي اللي بنحبه ونعلي صوته تانى ونبني له بكرة يليق بيه علشان يرجع ورأسه مرفوعه