المصريين عزموا شاب كوري على أكلة فسيخ .. شوف اللى حصل

كتبت الروائية والكاتبة هداء الجالي على صفحتها على الفيسبوك قصة اغرب من الخيال بطلها شاب كوري بيزور مصر ، واستضافوه  في بيتهم !!! وهذا نص ما قالته :

اتفاجئنا الصبح بعد الصلاه بضيف كوري الجنسيه في منصب ما مهم جاي مع قريب لينا ، الاول قريبنا اتصل عليا وانا كنت بنام شويه وجه وجاب الراجل معاه ، طبعا الاسره كلنا رحبنا بيه بس هو بيتكلم كذا لغه ماعدا العربي ، وده تاني عيد صغير يقضيه في مصر وهو طبعا غير مسلم هو بوذي ، الاول فطر كحك وبسكوت وشاي بلبن وكان المفروض أنه ساعه وهيمشي لانه جاي بارادته يتعرف علي العادات المصريه ولأنه ميعرفش مصريين اصلا غير قريينا وبعض المصريين اللي بيتعامل معاهم بشكل رسمي فقط

اختي مهندسه بتتكلم انجليزي بطلاقه وانا يعني علي قدي وبستعين بجوجل ترنسليت عرفناه عادات المصريين وعرفناه أننا اول يوم عيد بناكل كحك وبسكوت وده الصبح وبنتغدي فسيخ ورنجه وبصل وعرضنا عليه يتغدي وافق فورا واكل فسيخ ورنجه وبصل وباباغنوج وانبهر انبهار غير عادي طبعا فهمناه أن ريحته وحشه لكن طعمه جميل وممكن بس يجيلك مغص أو كده لكنه ورانا اكله شبه الفسيخ عباره عن اخطبوط معفن وقال إنه بياكلوه هناك ، حكينا ليه عن مصر وتاريخها وعاداتنا وتقاليدنا والإسلام وبعدين اكل سوداني وترمس وكميه الانبهار الغير طبيعيه في كل حاجه بيدوقها وياكلها وطلب أنه يبقي ديما علي تواصل بينا حتي أننا عزمناه علي فرح اخويا الاسبوع الجاي وهيجي وقال إنه مش متخيل عطف وحنان المصريين وكرمهم وأنه لازم لما نيجي عنده كوريا الجنوبيه يوجب معانا هو قال يرحب بنا بس خليها يوجب

الراجل اول مره في حياته يدخل بيت مصري وياكل فسيخ ورنجه وكحك وبسكوت وكميه السعاده في وشهلدرجه انه مش عاوز يمشي ، انا بصراحه بكتب البوست خايفه الفسيخ يعمله حاجه وتبقي مصيبه هو اللي صمم ياكل احنا قولنا عزومه مراكبيه وهو وافق