سلي صيامك مع الاعلامية نانسي ابراهيم .. أنواع الحب والمشاعر

● الحقيقة طول عمرى مؤمنة إن الحب معادل له كلمة Forever … أو للأبد ، مهما إعترته مواقف أو أثر عليه غياب أو نقص ، لكن إكتشفت إن كلمة للأبد دى أكتر كلمة بريئة وطفوليه وهبلة وغير دقيقة ومالهاش وجود ومش ممكن أبدا نستخدمها لوصف المشاعر .

● ليه دايما ندعى ربنا نقوله : ( يا مقلب القلوب ثبت قلوبنا على دينك ) ؟ لأن معنى القلب هو التقلب أو التغير .

● فى أنواع مشاعر يختص بها القلب لا تتغير زى حبنا بلا قيد أو شرط للأشخاص اللى من دمنا حب بلا سبب ولا مبرر حب أساسه العيلة حتى لو ما عملوش أى حاجة عشان يستحقوا الحب ده .

● وفى ناس تانية ف حياتنا بيعملوا لنا البِدع عشان يحسسونا بحبهم ، وللأسف مش بيقدروا يحركوا مشاعرنا مهما قدموا لنا ، وأفاضوا علينا إهتمام .

● وفى ناس عندها عطاء فى المشاعر والاهتمام وبتاخد بالها من تفاصيل اللى بتحبه وتقعد تدى تدى تدى لحد ما تدرك إنها اُستنزفت مشاعريا مع أشخاص مش مقدرينها .

● وناس تانية للأسف بتاخد ومش بتعرف تدى ، لحد ما تستنزف اللى أودامها من مشاعر ، وتراهن على صبره ، وتعلقه ، وحبه .. لكن للأسف هما مش عارفين انهم بالشكل ده عمالين يسحبوا من رصيدهم عند اللى بيحبهم .

● وفى ناس للأسف مش بتتعلم من الدرس ، وتفضل تعيد نفس المواقف ، والمشاعر ، والأشخاص ويكرروا نفس النمط Pattern ، ويستغربوا هما ليه فى كل مرة بيحصلوا على نفس النتيجة من الوجع والخذلان والكسرة والألم ؟!!!

● وفى ناس بتتعامل مع غيرها على أنهم بر أمان ، ومرفأ راحة ، ومصدر سكن ، ويشوفوا ان فى غيرهم لقوا المشاعر اللى كانوا محتاجينها … وللأسف هما بس اللى بيبقوا شايفين ده .

● وفى ناس بتتعامل مع غيرها كجسر بلا أى إلتزامات ، أو مجهود حقيقى ، أو إهتمام بجد .. بينظروا للأخر على انه Bus Stop أو محطة مؤقتة فلا بيخططوا لحاجة معاه ، ولا بيستثمروا فى العلاقة ، ولا بيلتزموا بأى وعود له ، ولا بيتمسكوا بالشخص لأنهم عارفين انهم ماشيين كده كده .

● وفى ناس بتدخل علاقات وتحس مشاعر كنوع من ال Rebound عشان متبقاش لوحدها خاصة لو لسه خارجين من علاقة قوية أو ممتدة أو طويلة و متعلقين بالشريك السابق لأى سبب .. فبيرموا نفسهم فى حضن حد جديد ودى علاقة بتبقى غير منصفة بالمرة للطرف الجديد لأنه بيتظلم جدا ويتاخد ف الرجلين ويحاسب على فاتورة حاجات معملهاش والطرف اللى لسه خارج م العلاقة ما بيبذلش ربع الحب أو المجهود أو الاهتمام اللى كان بيبذلهم ف العلاقة اللى قبلها .

● فى ناس بقى بتدخل علاقات وترضى بالقليل والقليل جدا عشان خايفة م الوحدة ، أو عشان بتتشعلق فى اخر طرف من أمل أنها تحب وتتحب بجد ، وتتحس بالقدر اللى هى أو هو يستحقه ، وانها تاخد من الدنيا حياة فبتقبل بالقليل ، وتكون النتيجة إنها تتوجع أكتر فى كل مرة ، وبتصاب بخيبة أمل جديدة فى كل مرة بتنتظر اهتمام من نوع خاص ومش بتلاقيه ، أو مواقف تثبت الحب اللى هى بتتمناه وتلاقي مواقف عكسها بتنفيه .. فبتكون النتيجة خذلان .. يُفضى إلى فتور .

● فى حب مقدر زى حبنا للأب والأم والأبناء والأخوات حب رابطة الدم .. ممكن الأب يبقى قاسى جدا ، و الأم تبقى أنانية وجامدة المشاعر ، والأبناء يبقوا جاحدين ، و الأخوات يكونوا حاقدين بس بتحبهم وتتفانى فى علاقتك بيهم لأنك فتحت عينك ف الدنيا دى واتعلمت تعمل كده … وبس .

● فى ناس بتدى بس ، وناس بتاخد بس ، وناس بتنتظر أمل وهمى ، وناس بتعيش حلم كداب ، وناس وحيدة حتى وهى ف علاقة ، وناس بتتونس بنفسها ، فى ناس مش شايفة اللى بيحبها بجد ، وفى ناس متعلقة باللى ما بيحبهاش … فى علاقات مع كل يوم بيعدى بتقوى المشاعر فيها ويتأكد الحب والرابطة بتبقى أقوى وأمتن ، وفى علاقات كل ما يمر عليها الوقت بتفقد جزء من سحرها ، ويصيبها الهزال ، وتقع فريسة الفتور .

● الحب يُختبر بالمواقف ، ويُمتحن بالإلتزام ، ويُترجم بالدعم ، ويقوى بالتفانى ، ويبان ف الشدة ، وينتصر على الخلافات ، ويتأكد بالتعبير عن المشاعر ، وينتعش بالتجديد ، ويقاس بإستثمارك فيه … وما دون ذلك ليس حباً .

● اللهم أرزقنا حبك وحب من يحبك ، وحب أشخاص لا تتغير ، وقلوب لا تتقلب ، ومشاعر دائمة قائمة أبد الدهر ، اللهم لا تعلق قلوبنا بما ليس لنا ، ولا تشغلنا بأمور لا سلطان لنا عليها ، ولا تعلقنا بأمل زائف فى هذة الدنيا ، وصب فى قلوبنا اليقين صبا ، ولا تكسر قلوبنا بفقدان أو وجع أو ألم … وأرزقنا السكينة ، وألهمنا صبرا ، وجملنا بالرضا .