دينا عاصم تكتب: إزاى أقلع الجزمة ؟

فكرة غريبة جدا أن الواحد يقلع الحذاء وهو داخل عند حد يزوره،
اعتقد انها فكرة غريبة عننا في مصر، لأن بيوتنا طول عمرها من الاف السنين بلاط او رخام، لكن في الخليج ظهر (الموكيت) ولانه غير صحي وبجمع اتربة وحشرات ومؤذي للصدر، الناس بقت تقلع الاحذية على الباب قبل دخول البيت.
ولما رجعوا مصر للأسف نشروا الفكرة وفرشوا الموكيت (اللي باشوفه أسوأ اختراع) وقلعوا الجزم.
بالنسبة لي اشعر بذهول اذا استقبلت ضيفا وهم بخلع حذائه، بسرعة اقول له لالاا اتفضل.
أراها اهانة شديدة الحقيقة ومفيهاش لياقة ان حد جاي يزورني اقلعه جزمته،
وتخيلوا لو ست شيك وانيقة واجبرها تدخل بيتي حافية !
انا عمري ما عملتها حتى لو لقيت أمام باب شقة الناس أحذية مستحيل اخلع جزمتي زيهم.
لا اخلع جزمتي إلا حين دخولي للمسجد فقط..
وكمان شكل البيت وهو قدامه الاحذية متكعبلة وحش اوي، ازاي استقبل الناس بالجزم كده على باب الشقة!
اه وبالمناسبة باقول جزمة او حذاء شوز دي سخيفة اوي وعلشان تبقى مؤنث يقولوها شوزة دي ركيكة جدا واحسها كمان رغم أنها كلمة انجليزي، باردون يعتي، بلدي اوي
قولوا جزمة عادي يا عيال😁
#تخاريف