مع تشغيل تقنية 5G.. هل سيغير المصريين الموبايل ؟ اعرف الاجابة
يا تري أية هيا تقنية 5G وتكلفتها كام.. واية الاستقافة اللي هتعود علي المواطنين من التقنية دي.. وكان امتي اول ظهور لكلمة «الو» اتقالت في مصر.
الحكومة المصرية وقعت مراسم منح رخصة تشغيل خدمات الجيل الخامس للتليفون المحمول بين الجهاز القومي لتنظيم الاتصالات والشركة المصرية للاتصالات بتكلفة وصلت إلي 150 مليون دولار، كخطوة من خطوات التحول الرقمي وتعزيز ترتيب مصر في المؤشرات الدولية بقطاع الاتصالات، ومتوقع بداية تشغليها في مصر في خلال سنتين الي 3 سنوات علي الاكثر.
طيب كان امتي اول ظهور لكلمة «الو» في خطوط الاتصال الارضي والمحمول في مصر؟.
في عام 1918 أسست الحكومة المصرية شركة باسم مصلحة التليفونات والتلغراف وهي الشركة اللي كانت بتجمع كل خطوط التليفون والتلغراف ومكاتب الخدمة في مصر، وكانت بداية ظهور أول كلمة “ألو” في خط أرضي في مصر عام 1926 مع تركيب أول 3 آلاف خط أرضي بمدينة القاهرة وبناء اول سنترال آلي، وفي عام 1928 تم بناء سنترال ثاني في مدينة الاسكندرية، وفي عام 1932 كان أول ربط لاسكي بين مصر وانجلترا عن طريق خدمة تحويل الموجات الصوتية لموجات راديو، بعدها دخلت دول ثانية زي الهند وكندا وجنوب أفريقيا وأمريكا واليابان وكان زمن المكالمة 3 دقائق وسعر الدقيقة الدولية 150 قرشا .
وفي عام 1996 حصل تحالف موبينيل اللي كان بيضم شركة أورنج العالمية وبعض المستثمرين المصريين وشركة أوراسكوم على أول رخصة للمحمول في مصر مقابل 1.755 مليار جنيه، وبعدها حصل تحالف فودافون مصر علي الرخصة الثانية للتشغيل في عام 1996 وكان اسمها “كليك جي إم إس”، وفي عام ٢٠٠٦ فازت شركة اتصالات مصر برخصة التشغيل الثالثة مقابل 16.7 مليار جنيه، واخيرا حصلت شركة المصرية للاتصالات علي الرخصة الرابعة مقابل نحو 7.1 مليار جنيه، وتطورت شبكات الهاتف المحمول بداية بظهور شبكات 1G و2G و 3G و G4 واخيراً G5 .
طيب هل البنية التحتية لشبكات الاتصالات قادرة علي تشغيل خدمات G5 ؟.
محمد نصر، الرئيس التنفيذي والعضو المنتدب للشركة المصرية للاتصالات قال أن البنية التحتية للشركة المصرية للاتصالات في الوقت الحالي قادرة على تشغيل خدمات 5G، وده هيساعد في زيادة إيرادات الشركة واشتراك عملاء جدد بعدما ماكانت الشركة أول مشغل لرخصة تشغيل الجيل الرابع لخدمات المحمول في عام 2017 .
الرئيس التنفيذي والعضو المنتدب للشركة المصرية للاتصالات كمل كلامه وقال إن الشركة الآن معاها 13 مليون عميل، وتوقع ارتفاع أرباح الإنترنت الثابتة بنسبة لن تقل عن 15% في الربع الأول من العام الجاري علي الرغم من تحريك أسعار باقات الإنترنت في الفترة الأخيرة.
طيب اية هيا مميزات الجيل الخامس لشبكات المحمول؟.
مصادر بقطاع الاتصالات اكدت أن سرعة شبكات الانترنت كان سبب في ظهور الجيل الجديد للشبكات الجيل الرابع 4G الحالية وهي النسخة المحسنة للجيل الثالث لشبكات المحمول 3G وأسرع 50 مرة منها، ولكن مع زيادة الاجهزة اللي بتسخدم الانترنت وحاجة المستهلكين لنقل البيانات الكبيرة بسرعات عالية، جت هنا الحاجة لدخول شبكات الجيل الخامس 5G إلى الخدمة.
المصادر قالت أن وجود شبكات الجيل الخامس وصل بفضل الثورة التي شهدتها شبكة الهاتف المحمول علي مستوي العالم، وبسبب مطالب المستهلكين بزيادة سرعات التحميل ورفع البيانات، وكان أول ظهور لها في السوق نهاية عام 2018، وبتوصل سرعتها 10 جيجابت بالثانية الواحدة وهي أسرع 100 مرة من تقنية الـ4G.
المصادر اختتم تصريحاتها أن الموبايلات الموجودة حاليا مع المواطنين اللي بتعمل بالجيل الرابع لخدمات المحمول 4G مش هتحتاج تتغير مع تشغيل الجيل الخامس، وباقي الأنواع الأخري هتكون في حاجة للتغيير.
