القبض على مستشار وزير التموين.. الراجل اللى نكد على المصريين 

قلنا وصرخنا هنا كتير وقلنا ياجماعه فيه حاجة غلط واللي بيحصل في الأسواق مستحيل يكون طبيعي.. يعني إيه انتاج سلعة زي السكر مثلاً يبقي كتير وبنفس معدلاته وتختفي من السوق وتتباع بالاوفر برايس كده فيه مئات آلاف من أطنان السكر اختفت واتحبست عن الناس والنتيجة كيلو السعر وصل 80 جنيه في بعض المناطق.. إيه اللي حصل وكشف اللي بيحصل في السوق وايه كواليس فضيحة وزارة التموين ووكر الفساد وازاي رجالة السيسي قدروا يحطوا أيديهم على اول الخيط اللي هيجيب كل حيتان الفساد الكبار

فجأة ومن غير مقدمات وبعد الناس ما فقدت الأمل في نزول الأسعار أو حب لغز اختفاء السلع الأساسية من الأسواق وارتفاع سعرها بشكل يدمر ميزانية اي بيت مصر لدرجة إن لو معاك 100 جنيه متعرفش تجيب بيها كيلو سكر وكيلو ارز رجع الامل تاني للناس بعد اللي حصل امبارح والناس عرفت إن فيه دولة وقانون وناس شغالة عشان تصيد الأفاعي من السوق واباطرة الفساد وعصابات السوق.. تعالوا الاول نشوف اللي حصل.

امبارح رجال الرقابة الإدارية اقتحموا وزارة التموين وخلي بالك بنقول الوزارة نفسها يعني مفيش حد كبير على القانون.. المهم وكانوا عارفين هما رايحين فين.. طبعا الوزارة اتقلبت لما رجالة السيسي اقتحموا مكتب مسؤول كبير في الوزارة وموظف مرموق ولسه مترقي جديد بسبب كفاءته وقالولع انت مقبوض عليك يالا معانا وانت عارف ليه وحطوا الحديد في أيديه طبعا مقدرش يتكلم من الصدمة وعشان عارف إن المستخبي خلاص ظهر وبان.

مع مستشار وزير التموين الرقابة الإدارية قبضت على 8 تانيين من أصحاب الشركات الخاصة اللي بتتعامل بالطبع مع وزارة التموين وبكده يبقي بدأنا نفهم اللعبة.. وظهر أننا قدام تشكيل عصابي كبير ومافيا خطيرة ليها علاقة مباشرة باللي بيحصل في السوق… طبعا التحقيقات كشفت مفاجآت صادمة منها إن مستشار وزير التموين، الفاسد والمرتشي هو نفسه مسؤول عن ملف الأكل والشرب بتاع المصريين.

ولسه معاكم في التفاصيل وطلع إن المتهمين في شبكة فساد وزارة التموين حصلوا وقدموا رشاوي للتلاعب في أسعار السلع وحجب المواد التموينية عن المواطنين، والرقابة الإدارية صادرت 900 طن سكر يعني 900 ألف كيلو يافندم وفي مخزن واحد واتضح أنه سكر تموين وتم بيعه لمصنع تعبئة عشان صاحبه يكسب ملايين وطبعا عارفين مين في الوزارة اللي سرب له شحنات السكر

ولأن الموضوع أمن قومي والشبكة كبيرة والتفاصيل كتيرة جدا نيابة أمن الدولة العليا، استلمت ملف القضية ووجهت للمستشار وباقي المتهمين تهم تكوين تشكيل شبكة فساد وارتكاب جرائم حجب السلع واحتكارها ورفع الأسعار والاستيلاء على المال العام والرشوة والفساد واستغلال النفوذ.

ولأن الفساد شبكة واحدة مهما كان حجمها مصادر داخل وزارة التموين والتجارة الداخلية قالت إن فيه مسئول كبير في الوزارة قدم استقالته لوزير التموين، الدكتور علي مصيلحي على خلفية قضية الفساد الكبرى اللي متورط فيها مستشار وزير التموين للرقابة والتوزيع.

من عجايب القدر أن وزير التموين طلع من كام يوم واتكلم عن أزمة السكر وقال إن مفيش مشكلة في الإنتاج لكن فيه لغز في التوزيع عشان السكر بيطلع عشان يتوزع للناس لكن بيختفي في نص الطريق واتضح إن مستشار الوزير نفسه واللي مكتبه جمب مصيلحي هو اللي وراء الموضوع وكان بيحجب السلع عشان يحرق جيوب الغلابة والتجار الكبار وأصحاب الشركات يكسبوا ملايين وطبعا عمولة المستشار محفوظة.

طيب اللي حصل دا بيقول ايه.. اكيد بيقول إن الفساد لسه موجود في أماكن كتير والمنصب ساعات بيغري لكن بيقول بردوا في نفس الوقت إن مصر فيها رجالة صاحية ورئيس مش بيرحم أى مسؤول يخرج عن مقتضيات وظيفته ومهما كان اسمه أو منصبه هيتقدم للمحاكمة.. واللي حصل بيقول بردوا إن الأسواق الفترة الجاية هترجع زي الاول لأن التحقيقات هتجيب كل الناس اللي استغلت الأزمات ورفعت الأسعار بعد ما تحكمت في السوق بفضل مسؤول فاسد.