أرملة محمد حسنين هيكل: أنا اللى طلبته للزواج وكنت بغير من الصحافة
قالت هدايت تيمور أرملة الكاتب الصحفي الراحل محمد حسنين هيكل: “بعد قصة حب مع هيكل روحت وسألته أستاذ حضرتك ناوي تتجوزني؟”.
شخصية محمد حسنين هيكل
وأضافت خلال لقائها ببرنامج “معكم” الذي تقدمه الاعلامية منى الشاذلي بقناة “أون”: “كل دلالات هيكل كانت إيجابية أنا كنت لا بتاعت لف ولا دوران وهو مكنش بيلف ويدور على، ولما سألته انت ناوي تتجوزني بيقولي أنا اتخضيت وبعدين قال لي طبعا اتجوزك، فقلت له تيجي تقابل بابا”.
ولفتت: “فرحنا كان في جنينة البيت بتاعنا، وأنا واخواتي الأربعة اتجوزنا في بيوتنا، واعتقد أن محمد حسنين هيكل حبني جدا بس أنا كنت بغير من الصحافة لإنه كان بيديلها وقت طويل أوي ولما راح الأهرام قال لي يا هدايت هتستحملي سنة متعبة جدا فقلت له علي خيرة الله والحقيقة انه لما يجي البيت بيحس بسكينة وكنت بحاول حتى متكلمش في السياسة ولا أي حاجة تزعله فكان بيخش بيرتاح، وانا حتى هذه اللحظة معجبة بالأستاذ هيكل”.
كواليس عن حياة هيكل
وتابعت:”الأستاذ هيكل كان بيتجدد قدامي بما يقوله ولغاية النهاردة ساعات أقوم من النوم أدور عليه، وابقى عايزة اكلمه واحكيله”.
