مفاجأة لمصر في البريكس.. مهمة الجبالي فتحت باب المليارات
ايه الجديد اللي حصل النهاردة في البريكس وإيه أول خطوة مصرية تمت وإيه سر زيارة الدكتور الجبالي لجنوب إفريقيا وايه هي المفاجأة لمصر من المجموعة الصاعدة عالميا.
معروف ان قادة دول بريكس قرروا قبول عضوية مصر بداية من يناير اللي جاي، وكلنا عارفين يعني ايه انضمام مصر للبريكس وتحالف بيضم أسواق واسعة وبشر بالمليارات وفرص ملهاش أول من أخر ، واتفاقات وتعاون وشراكة بين دول مصر ودول المجموعة بعد الانضام المصري للتكتل اللي بتقوده الصين وروسيا والهند.
والبريكس عمل مفاجأة لمصر وهي دعوة رسمية لمصر للمشاركة في أعمال النسخة التاسعة للمنتدى البرلماني لدول تجمع بريكس، والمُنعقدة في جمهورية جنوب أفريقيا، وفعلا حضر المستشار الدكتور حنفي جبالي رئيس مجلس النواب على رأس وفد من مجلس النواب فعاليات المنتدى، ودي أول مشاركة مصرية من نوعها منذ دعوة مصر للإنضمام لعضوية تجمع بريكس.
طبعا الدعوة لمصر مش على أساس إنها ضيف لكن على أساس إنها خلاص بقت عضوة رسمية في التكتل، ودا الحقيقية بيودينا لزاوية تانية وهي حجم المكاسب اللي مصر هتاخدها من الانضمام للبريكس واللي أكيد هتكون سبب مباشر في التخلص من ضغط الدولار على الموازنة المصرية وفي نفس الوقت هتفتح المجال للجنيه المصري للعودة من جديد.
خطوة النهاردة بتأكد إن مصر مستسلمتش للضغوط من أطراف دولية للتراجع عن عضوبة بريكس، واللي متوقع إنها تضيف قوة إضافية للاقتصاد المصري في المنطقة، وفي نفس الوقت هتدي ميزة مهمة جدا للقاهرة إنها تكون بوابة أفريقيا الشمالية لدول البريكس والتجارة الدولية وهيدي الموقع المصري الجغرافي الفريد قوة وأهمية أكتر لعبور التجارة الدولية بين دول المجموعة دا غير الأهمية الجيو سياسية طبعا ودا بسبب الصعود المضطرد لقوة البريكس والثروات وحكم الاقتصاد لدول التجمع.
بريكس بالنسبة لمصر بقى واقع وبتتصرف دلوقتي على انها عضو في البريكس ولو تابعنا هنلاقي فيه جولات بين وفود مصرية ووفود من دول البريكس بتم دلوقتي على أعلى المستويات لتنسيق المواقف وكان أخرها زيادة المصرفي المخضرم حسن عبد الله محافظ البنك المركزي المصري للصين واستقباله هناك استقبال خاص ودا غير الزيارات الرفيعة بين القاهرة ونيودلهي وتصريحات رئيس وزراء الهند المهمة عن مصر،وأخرها زيادة الدكتور جبالي لجنوب أفريقيا ودا كله تمهيد للواقع الجديد اللي هيتم الإعلان عنه بمجرد دخول مصر للتحالف يناير اللي جاي.
