أخيرا انفراجة كبرى في أزمة أسعار السيارات.. فتح الاستيراد والإسعار هتنزل

ايه اللي بيحصل في سوق السيارات وايه الاخبار الحلوة اللي الناس مستناياها وهل ياترى الأسعار ممكن ترجع زي الاول والناس ترجع تحلم تشتري عربية وياترى الأرقام بتقول ايه عن السوق وعلاقتها بالدولار

قطاع السيارات من اكتر القطاعات اللي اتأثر بأزمة الدولار على طول خط الأزمة بسبب توقف الاستيراد تقريباً نتجية سياسة ترشيد الإنفاق اللي اتبعتها الحكومة مع ذروة أزمة نقص الدولار في السوق بعد اندلاع الأحداث العالمية وبسبب دا اسعار السيارات وصلت لارقام خيالية والعربية اللي ب300 الف وصلت لمليون وكل ما الطلب زاد على العربيات الأسعار ترتفع زيرو ومستعمل ودا خلى ناس كتير تأجل حلم شراء عربية لغاية الأسعار ما تنزل شوية.
لكن الجديد اللي حصل واللي يعتبر مؤشر على بدء انفراجة كبرى في قطاع السيارات هو بداية عودة الاستيراد الكثيف للسيارات من الخارج ولقطع الغيار ودا معناه إن الأزمة بدأت تفك وهيزيد المعروض من السيارات وبالتالي الأسعار هتنزل حسب حالة السوق والأهم إن عودة الاستيراد هتصب في صالح استقرار أسواق السيارات وهتتقف نزيف الصعود الكبير في الأسعار وكمان طالما الاستيراد رجع للعربيات الزيرو يبقي طبيعي الأسعار هترتاح في المستعمل ودا سوق كتير من المصريين بيعتمدواة عليه عشان يشتروا عربية على قد الايد وحالتها كويسة.

ونرجع للأرقام اللي بتأكد عودة الروح لأسواق السيارات هتلاقي إن بيانات رسمية حديثة كشفت إن واردات مصر من السيارات سجلت ارتفاعا للشهر التاني على التوالي خلال شهر يونيو الماضي.

وحسب البيانات الصادرة عن الجهاز المركزي للتعبئة العامة والإحصاء، بلغت قيمة الواردات المصرية من السيارات 129.353 مليون دولار خلال شهر يونيو الماضي، مقارنة بـ 99.662 مليون دولار في شهر يونيو 2022، بزيادة بلغت 29.691 مليون دولار، بنسبة زيادة بلغت نحو 29.7%.
ووحسب البيانات بردو بدأت واردات السيارات تعود للارتفاع بداية شهر مايو الماضي، و بلغت قيمة الواردات 169.399 مليون دولار، مقارنة بنحو 123.126 مليون دولار خلال نفس الفترة من العام الماضي بزيادة قيمتها 46.273 مليون دولار، مسجلة ارتفاعاً بنسبة 37.5%.

وبخصوص الأرقام حابين نفكركم إن الواردات المصرية من السيارات أغلقت العام الماضي 2022 على تراجع تجاوز 1.5 مليار دولار، بسبب انخفاض واردات سيارات الركوب إلى 1.915 مليار دولار، مقارنة 3.664 مليار دولار خلال عام 2021 بتراجع بلغت قيمته 1.749 مليار دولار مسجلة انخفاضاً بنسبة 47.7%.

كمان كشفت البيانات الصادرة عن المجمعة المصرية للتأمين الإجباري للمركبات عن ارتفاع عن عدد المركبات اللي تم التأمين الإجباري عليها وتم ترخيصها “زيرو” خلال أغسطس اللي فات واللي سجلت 26673 مركبة متنوعة ما بين سيارات ملاكي ودراجات نارية وسيارات نقل.
وأشار التقرير إلى أن المبيعات الفعلية للسوق في حالة ارتفاع بالمقارنة بالشهر السابق، ودي كلها بيانات وارقام بتقول إن الأزمة بدأت تتحل في قطاع السيارات وقطع الغيار، والأهم من دا كله عودة استيراد السيارات بيأكد حدوث انفراجة كبيرة في أزمة الدولار بدليل عودة الاستيراد الكثيف للسيارات.