5 مليار دولار في الطريق لمصر.. بشاير الخير هلت
فيه انفراجة كبيرة ومهمة بتحصل في أزمة نقص الدولار في مصر وخلال فترة صغيرة جدا هيتم جمع حوالي ٥ مليار دولار.. والمبلغ ده هيعمل وفرة كبيرة في المعروض من العملة الأجنبية وهيخلي السوق السودا للدولار تتراجع بشكل ملحوظ.. وده كمان ممكن يخلي الحكومة ما تكنش متضطرة لتخفيض سعر الجنيه من جديد.. فيا ترى الحكومة هتجيب ال ٥ مليار دولار دول منين؟ وايه تأثيرهم على الوضع الاقتصادي لمصر؟ وهل تقدر الحكومة بالفلوس دي تفك أزمتها وتسد الالتزامات البي عليها؟
في الايام الأخيرة الحكومة المصرية بتواصل تحركاتها المكثفة لجمع حوالي 5 مليار دولار من عائد برنامج الطروحات من دلوقتي ولغاية منتصف العام المقبل.
ووفقا للمعلومات المتاحة فالحكومة بتعتزم بيع حصة إضافية بقيمة 10% من الشركة المصرية للاتصالات لمستثمرين وصناديق استثمار عربية في إطار برنامج الطروحات اللي بتستهدف منه جمع حوالي ٤٠ مليار خلال ال ٤ سنين الجايين.ووزارة المالية بتدرس مؤخرا بيع حصة إضافية تتراوح بين 10 إلى 15% من “المصرية للتصالات”. ومن المتوقع إتمام عملية البيع قبل نهاية ٢٠٢٣.
وفي مايو اللي فات أعلنت الحكومة بيع حصة 10% من الشركة عبر البورصة المصرية، وخفضت حصتها إلى 70% من اسهم الشركة العملاقة أما باقي الأسهم في المصرية للاتصالات فهي أسهم حرة التداول.
وكانت عملية بيع حصص في المصرية للاتصالات أول صفقة بيع ضمن برنامج الطروحات اللي أعادت الحكومة إطلاقه في فبراير اللي فات واللي بتستهدف من خلاله بيع حصص في 35 شركة مملوكة للدولة.
والشركة المصرية للاتصالات واحدة من بين 3 شركات أضيفت إلى برنامج الطروحات الشهر اللي فات بعد بيع حصة الـ 10%.
وبتسعى الحكومة في الوقت الحالي لجمع حوالي 5 مليار دولار من خلال طرح حصص من الشركات والأصول المملوكة للدولة لغاية نص السنة الجاية.
ووفقا لشروط برنامج قرض الـ 3 مليار دولار مع صندوق النقد الدولي استأنفت الحكومة السنة دي برنامج الطروحات العامة المتوقف من فترة طويلة في محاولة لجذب تدفقات النقد الأجنبي اللي بتحتاجها مصر بشدة لدعم مركزها الخارجي وتعزيز أداء عملتها المحلية مقابل الدولار.
ومن المحتمل توصل جهاز قطر للاستثمار إلى تسوية مع المصرية للاتصالات للاستحواذ على جزء من حصتها البالغة 45% في شركة “فودافون مصر”، بحلول نهاية الشهر الجاري.
ولحد دلوقتي حجم الحصة هو النقطة الشائكة فى المفاوضات بين الطرفين فالشركة المصرية للاتصالات غير مستعدة للتخلي عن أكتر من 30% من حصتها في “فودافون مصر”، خاصة انها أحد المصادر الرئيسية للأرباح اللي بتحققها الشركة سنوياً.
ولغاية دلوقتي الحكومة رافضة الاستجابة لرغبة صندوق الاستثمار القطري في الحصول على حصة أكبر في الشركة
وتمتلك شركة “فوداكوم” الجنوب إفريقية الحصة المتبقية البالغة 55% في “فودافون مصر.
وفى الاتجاه ده تلقت الحكومة المصرية 5 عروض من مستثمرين لشراء مزرعة رياح جبل الزيت بطاقة 580 ميجاوات، حسب تصريحات لوزيرة التخطيط هالة السعيد.
وكشفت بعض التقارير ان شركة الاستثمار المباشر البريطانية “أكتيس”، اللي بتركز على الأسواق الناشئة قدمت عرض مبدئي لشراء مزرعة الرياح، ووقع اختيار الحكومة على عرضها باعتباره الأفضل من الناحيتين الفنية والمالية.
والحكومة بتسعى لزيادة قيمة الصفقة من 400 مليون دولار إلى ما بين 600 إلى 800 مليون دولار ومن المتوقع إتمام الصفقة بحلول أكتوبر أو نوفمبر الجاي. .
