السعودية عاوزة توصل لإيه؟.. سر المليارات اللي ملهاش صاحب

يا ترى السعودية عاوزة توصل لإيه ؟ وليه المملكة بتصرف مليارات الدولارات على كرة القدم؟ وايه اللى ممكن تكسبوا من استقدام لاعبين بحجم كريستيانو رونالدو وكريم بنزيما ونيمار؟ وهل الفلوس اللى بتتصرف هتوازي العائد اللى ممكن ييجي من وراها؟ وليه مصممين أوي كده على شراء محمد صلاح من ليفربول حتى لو دفعوا فيه رقم هيكون الأغلى فى تاريخ كرة القدم؟ وايه دور الأمير محمد بن سلمان ولى العهد في التغيير اللى بيحصل فى المملكة؟

فى سنة 2017 .. وبعد أيام من اختياره وليا للعهد.. بدأ الأمير محمد بن سلمان تنفيذ خطة طموحة للسعودية.. خطة هدفها تغيير جلد المملكة ووضعها على خريطة العالم بشكل جديد.. وبسبب موقعه ونفوذه الواسع في هرم السلطة سعى مولي عهد المملكة لتطبيق إصلاحات اقتصادية واجتماعية في السعودية من خلال”رؤية 2030″ الطموحة اللي هدفها تنويع الاقتصاد عبر التقليل من الاعتماد على النفط وجذب استثمارات في قطاعات تانية من بينها الترفيه والرياضة.
وفى نهاية السنة اللى فاتت تبنى الأمير محمد بن سلمان مشروع ضخم لوضع المملكة العربية السعودية على الخريطة العالمية لكرة القدم من خلال استقدام عدد كبير من نجوم الساحرة المستديرة للعب فى الدوري السعودي وكانت البداية من سشهر يناير اللى فات لما تم الاعلان عن الصفقة المدوية باستقدام اهم لاعب فى العالم كريستيانو رونالدو من نادي مانشستر يونايتد الانجليزي فى صفقة أحدثت ضجة في عالم كرة القدم فى كل العواصم الاوربية، وبان من خلالها السعودية بتفكر ازاي وعاوزة توصل لايه خصوصا ان بعدها بأيام دخل صندوق الاستثمارات العامة السعودية اللى بيمتلك عدد من أكبر الأندية السعودية فى مفاوضات جادة مع النجم العالمي ليونيل ميسي، وكان الهدف ان ديربي ميسى ورونالدو ينتقل للسعودية وبدل ما العالم كله كان بيتابع مباريات الثنائي فى الدوري الاسباني مع ريال مدريد وبرشلونة يتابعها من خلال الدوري السعودي.
ورغم ان المفاوضات مع ميسي لم تكلل بالنجاح الا ان المسئولين فى السعودية كملوا مشروعهم ولجأوا لاختيارات تانية لأسماء ليها باع وصيت كبير فى الملاعب الاوربية كان من بينهم نجم ريال مديريد كريم بنزيما الفائز بالبالون دور كأفضل لاعب فى العالم ومن بعده نجم البرازيل الساحر نيمار اللى انضم لنادي الهلال فى صفقة مدوية.
الصفقات الضخمة اللى ابرمتها السعودية خلت الدوري السعودي محط أنظار العالم وكفاية تعرف ان حاليا فيه أكتر من 50 قناة بتنقل مباريات دوري روشن فى أكتر من 125 دولة.. وده رقم محصلش قبل كده مع اى دوري عربي ويمكن مع دوريات اوربية كبيرة زي الدوري الفرنسي والدوري الايطالى وحتى الدوري الالماني.
السعودية عارفة كويس اوى هي بتعمل ايه وعارفة عاوزة توصل لفين ومدركة ان القوى الناعمة اللى شغالة عليها هيضمنلها انتشار رهيب جدا فى كل دول العالم يعنى كل دولار بيتدفع بيحقق الغرض منه فى دعاية للمملكة كانوا ممكن يصرفوا مليارات الدولارات فى حملات تسويق وما يعرفوش يحققوا بيها ربع النتايج اللى هتحصل من كرة القدم.
يعنى من الآخر السعودية ما بترميش فوسها فى الارض زي ما ناس كتير متخيلة ولا اللى بيديروا الرياضة هناك ناس مش فاهمة وبيصرفوا وخلاص .. لا كل حاجة متخططلها .. والهدف ان السعودية تدعم السياحة غير الدينية وتتحط على خريطة العالم السياحة وتروج للأماكن التاريخية ومفيش أحسن من كرة القدم اللى بتحظى باهتمام غير مسبوق من الشباب فى كل دول العالم
وده يبينلك ليه فيه اصرار لآخر نفس على شراء النجم المصري محمد صلاح من نادي ليفربول حتى لو دفعوا فيه أعلى رقم للاعب كرة قدم فى التاريخ.. لأن وجود صلاح فى الدورى السعودي معناه متابعة واهتمام عالمي وعربي خصوصا ان صلاح بقا ليه شعبية فى كل الدول وطبعا الجمهور المصري هيكون أول حد هيهتم بالدوري السعودي ويتابع مبارياته عشان يشوف صلاح.
وخلى بالك الأشقاء فى السعودية مؤمنين جدا بمثل مصري عظيم هو “ادى العيش لخبازه” وعشان كده راحوا اتعاقدوا مع النيجيري مايكل إيمينالو لتولي منصب المدير الرياضي للدوري السعودي لكرة القدم.. وللى ميعرفش فايمينالو كان لاعب مميز لعب في العديد من الأندية في بلجيكا وإنجلترا وإسبانيا والولايات المتحدة، ومثل منتخب نيجيريا في 14 مباراة دولية.
وايمينالو ليه تجربة عظيمة فى الادارة لما اشتغل مدير رياضي لنادي تشيلسي الانجليزي وكان مسئول عن اكتشاف المواهب وقدر يجيب للنادي اللندني اسماء عظيمة زي دي بروين نجم مانشستر سيتى حاليا ومحمد صلاح وفابريجاس ونجولو كانتي.
مستنين نشوف تجربة السعودية فى كرة القدم هتوصل لفين.. بس مفيش شك ان اللى بيحصل فى المملكة ثورة فى كرة القدم وفى اقتصاد الملاعب