مصر هتعدى دول أوربا وهتبقى سابع أقوى اقتصاد في العالم بـ10 تريليون دولار

بكرة تشوفوا مصر وهتبقى قد الدنيا.. الكلمة دي قالها الرئيس في بدايات حكمه وناس كتير قالت دي أحلام ومش هتتحقق وبالمنطق والعقل كان عندهم حق.. إزاي دولة لسه طالعة من فوضى وداخله في حرب حقيقية مع الإرهاب ومفيش سياحة ولا استثمار ولامشروعات ولا احتياطي ولاتجارة واللي كان فاضل في البنية التحتية ادمرت في أحداث يناير.. لكن السيسي كان عارف ومؤمن بقدرات البلد وثقته في الشعب المصري وكان حافظ نفسيته كويس.. الشعب المصري بيضحي بكل حاجة ويستحمل النار لو بس شاف إن فيه ناس شغالة للبلد ومش بتسرق ثرواتها.. وقد كان..

مصر هتبقى سابع أكبر اقتصاد في العالم.. دا مش كلامنها دا تأكيد وبيانات صادرة من بنك الاستثمار الأميركي جولدمان ساكس، وقال فيها إن الصين هتبقى أكبر اقتصاد عالمي قبل حلول 2075، حيث قدّر الناتج المحلي الإجمالي لها بـ 57 تريليون دولار، وبعدها الهند واللي هتعدي الولايات المتحدة وهتبقي القطب التاني في الاقتصاد العالمي مع ناتج محلي إجمالي 52.5 تريليون دولار متجاوزة الولايات المتحدة واللي هتحل في المرتبة التالتة بناتج 51.5 تريليون دولار.
وقال التقرير إن الاقتصاد المصري هيحتل المرتبة السابعة عالمياً، متقدماً على كل اقتصادات أوروبا مع ناتج محلي إجمالي يتجاوز 10 تريليونات دولار حسب توقعات جولدمان ساكس، وقبل ألمانيا صاحبة أكبر اقتصاد أوروبي واللي هتيجي في المركز التاسع عالمياً خلف البرازيل اللي هتيجي ورا مصر في المركز التامن وفي المركز العاشر جت المكسيك بـ7.5 تريليون دولار

دي الدولة الجديدة ودي الاختلاف اللي حصل المصري عرف قيمته مكانه ولو قلت لحد إننا هنبقي أقوى من ألمانيا كان هيقول عليك مختل نفسيا، ولو بصيت على ترتيب أقوى 10 اقتصاديات في العالم في 2075 مش هتلاقي دول مهمة كتير، عندها إمكانيات مالية جبارة دلوقتي مقارنة بمصر زي دول الخليج العربي وفي أسيا زي كوريا الجنوبية وسنغافورة وتايوان وكندا وكل دول مصر هتعديهم في الاقتصاد.