من ألاف السنين ومصر معروفة إنها سلة غذاء العالم وفي وقت كانت المجاعة بتنهش الشعوب التانية مصر كانت عندها صوامع قمح أنقذت العالم كله من الموت، ومصر أول دولة في العالم عرفت الزراعة وقوانين الري وروضت الفيضان وعرفت مواسم المطر,., مصر دلوقتي راجعة تاني تبقي قوى زاعية وصناعية بمشروع القرن.. ياترى الرئيس السيسي بيعمل إيه في الصحراء الغربية وإيه هو المشروع اللي هيقلب موازين الاقتصاد المصري
لو متعرفش حضرتك نحب نقولك إن مصر حاليا بتشق قلب الصحراء الغربية وصولا للضبعة في الغرب وتبني أكبر نهر صناعي بالعالم ضمن مشروع الدلتا الجديد العملاق لزراعة حوالي  3 مليون و700 ألف فدان.

وعشان نفهم ايه اللي بيحصل في النشاط الزراعي في مصر في الكام سنة اللي فاتت فمصر بتنفذ عدد كبير من المشروعات القومية العملاقة وفي مقدمتها المشروعات الزراعية واللي بتعتبر أساس صناعات كتير وبتوفر الأمن الغذائي القومي لبلد فيه أكتر من 110 مليون بني أدم مصرين ولاجئين  ومن أهم المشروعات دي مشروع زراعة مليون ونص فدان بالصحراء الغربية اعتماد على المياه الجوفية ودي أول مرة تحصل يعني مش لازم الأرض تتروي من النيل، والمشروع التاني هو الدلتا الجديدة غرب الإسكندية وده هيزرع 2,2 مليون فدان اعتمادا على المياه السطحية من فرع رشيد، ومياه الصرف الزراعي بعد معالجتها من خلال النهر الصناعي.

وحابين نوقف شوية عند النهر الصناعي العظيم ودا يعتبر نيل جديد طوله أكتر من 113 كيلو متر غير تفرعاته المستقبلية ودا بيشق الصحراء علشان يزرع ملايين الأفدنة اللي قلنا عليها ويحول الصحراء لجنات خضرا بتتزرع فيها كل أنواع المحاصيل والفواكه في الأرض البكر.

والنهار الصناعي دا عبارة عن شبكة مواسير عملاقة بتشق الصحراء الغربية وعلى طول النهر فيه محطات رفع عملاقة ومحطات سحب ومحطات توزيع وكمان محطات طاقة كهربائية، ووظيفته نقل الميه من أكبر محطة في مدينة الحمام وهي أكبر محطة للمعالجة في العالم، والنهر بيعتير مشروع هندسي فريد على مستوى العالم بسبب التفاصيل الكتبرة اللي فيه، فمثلا المشروع فيه 22 كيلو متر من المواسير  العملاقة تحت الأرض.

الميزة في المشروع إنه بيطيق فكر الرئيس السيسي والحكومة بالتفكير خارج الصندوق واستغلال الطاقات والموارد الغير مستغلة، زي ماحصل في مشرروع الدلتا الجديدة لأن أغلبه بيقوم على استغلال مياه الصرف الزراعي والمياه الجوفية والسطحية بعد معالجتها بمحطة مياه الحمام.