مروة عتمان تكتب : ظاهرة كيس اللحمة !!
#بقى عندنا ظاهرة غريبة أوى ف السنين الأخيرة من بعد الناس كلها م بقت تستخدم الميديا سواء اللى بيفهم واللى مابيفهمش
كل واحد رايح ليه كيس لحمه مش عاجبة لازم ينزله ع النت
ياسيدى الفاضل وياستنا المحترمة … صاحب الاضحيه بيكون بيدبح لله بيفدى نفسه وأهل بيته مش هيستخسر فيك حته لحمة حمرا
ماسألتس نفسك أنت ولا هى
أن ممكن الأضحيه تندبح وقبل مايندبح العجل نقف كلنا نقول بسم الله ماشاء الله دا هيرمى لحم
ندبح ونسلخ ونلاقى الضحيه كلها سمينه ف الحالة دى هنعمل ايه ؟؟؟؟
طب لو صاحب الأضحية ماوزعش اللحمه عليك وع غيرك
هتفضحوا ف البلد والبلاد اللى حواليكم أنه دبح واللحمه ماجتش ليكم
طب لو جاب اللحمه سمينه وماعجبتكمش
هتفضحوا وتفضحوا اهله ع النت
الناس مابقاش عندها حياء والله
صدقونى صاحب الأضحيه بيطلع ف الاخر تلاجته فاضية
أنا واحده من الناس مابدورش أخد منها ايه بقول كله بتاع ربنا وكله لله طالما ربنا قدرنا ودبحنا يبقى كله بتاع ربنا
بس فعلا موضوع ان كل واحد يصور كيس لحمته وينزلها ع النت ويتكلم ويقول حته صغيرة … والتانى يقول لا الحته سمينه كل دا قلة قيمة ليكم صدقونى
