سارة الشيشتاوى تكتب: ان خلص الفول أنا مش مسئول !
إن خلص” الفول “أنا مش مسؤل ودي حكاية الفول مع السحور زمان في رمضان، كان الفول المدمس هو الملك الحقيقي للسحور، الناس كانت بتتسحر بيه، وأهالينا كانوا بيعملوه في البيت بطريقة تجوعك حتي بعد الفطار,
ليه الفول كان ملك السحور؟
الفول المدمس كان بيعتبر وجبة أساسية للسحور, الناس كانت بتحبه مع الطحينة والليمون والزيت، وكانوا بيقولوا فول وطعمية أحلي سحورية، أهالينا كانوا بيعملوا الفول في البيت، ويضيفوا عليه شوية توابل تديه كدا طعم مميز توديه في حته تانيه،
اما بقي أصل الفول المدمس
الفول المدمس أكلة مصرية أصيلة، قصة الفول المدمس بترجع لعصر قديم جدآ ، المصريين القدماء كانوا بيحبوا الفول جدآ وكانوا بياكلوه مسلوق ومدمس ، كلمة “مدمس” جاية من اللغة القبطية “دمس” ومعناها يدفن أو يطبخ في الأرض ،
أما بقي جملة ” إن خلص الفول أنا مش مسؤل ” في الشوارع زمان، كان فيه بائع فول بيقول إن خلص الفول أنا مش مسؤل، وده بقي عشان يلم الزبائن عليه، فكانت الناس تجري عليه عشان يلحقوا يجيبوه لأنه وجبه أساسية بسحورهم، وكانوا بيقولوا عايزين نتسحر ياعم فين المدمس، كان صوت البائع بيملا الشوارع، إن خلص الفول أنا مش مسؤل.
الفول مش بس أكلة الفول كان بيجمع بين الغلابة والأغنياء، كل الناس كانت بتتسحر بيه، وكان علامة للإجتماع والترابط.
وعن ذكريات السحور هقولك
السحور الجماعي كان الناس بتتسحر سوا في الشوارع، وتتشارك الفول والطعمية ، المسحراتي كان بيمر في الشوارع، يدق على الطبل ويقول أصحوا يا نايمين، ومدد يا نبي مدد، في الأجواء دي كانت الناس بتستمتع بالسحور، وتتفرج على الزينة والفوانيس وحب اللمة والترابط، ولعب الأطفال بالشوارع والحواري كانت الدنيا أمان وحلوة ورمضان كان أحلي زمان، عشان لمة الأهل والصحاب والجيران.
” الخلاصه”
إن خلص الفول أنا مش مسؤل كانت جملة بتتقال في الشوارع، بس الفول كان دايمًا موجود في السحور، خلينا نحافظ على ذكريات رمضان الجميلة، ونستمتع بالسحور مع اللي بنحبهم .
