رسالة وداع من ناصر ماهر للزمالك وجماهيره
كتبت سوزان مرمر
وجه ناصر ماهر رسالة وداع لجمهور الزمالك بعد انضمامه رسميًا إلى صفوف بيراميدز خلال فترة الانتقالات الشتوية الجارية.
وقال ماهر في رسالة له عبر حسابه الشخصي على موقع “إنستجرام: “مش عارف أبدأ منين، لأن في حاجات مش سهلة تتقال، خصوصًا لما تكون بتتكلم لجمهور عظيم مثل جماهير الزمالك داخل القارة وخارجها، اسمحولي أعبر عن حبي واحترامي ليكم والله مش مجرد كلام”.
وأضاف: “من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو عشان لاعبين كبار وشخصيات محترمة بتتحمل أكتر من أي حد، أو عشان الجمهور المختلف بأجواءه ودعمه ومتعتُه، بس في الآخر الكرة ممكن تخليك تسيب مكان أنت بتحبه وده جزء من اللعبة، أنا بحبكم جدًا والله”.
وأكمل: “النهاردة آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وحب، إنتوا خلتوني نجم بجد، ودايمًا بقول إن ربنا أكرمني بجمهور الزمالك”.
وتابع: “يمكن الرحلة خلصت دلوقتي بسبب ظروف النادي الصعبة، وأتمنى أكون جزءًا ولو بسيط في حل الأزمة المالية، واقدر أساعد النادي، لأن الزمالك كبير ويستحق أن الواحد يضحي عشانه، وبالنسبة لي، الرحلة لسه فيها فصل تاني… إمتى؟ الله أعلم”.
واستكمل ناصر ماهر: “أشكر كل زملائي اللاعبين الرجالة بجد في كل المواقف وأشكر إدارة النادي الزمالك برئاسة الكابتن حسين لبيب، وبشكر جميع المدربين اللي تدربت معاهم”.
وواصل: “شكرا جون إدوارد، شكرا عبد الناصر محمد، شكرا أحمد سليمان اللي خلاني أكون متواجد داخل نادي الزمالك، وكمان أشكر الأوفياء جمهور الزمالك العظيم، الداعم الأول للنادي”.
واختتم حديثه، قائلًا: “أنا دخلت النادي وقلت أنا بحب الزمالك، ودلوقتي وأنا ماشي بقول هفضل أحب الزمالك”.
