ياسمين شفيق تكتب: الصداقة الحقيقية
المعنى الحقيقى للصداقه
…والفرق بين الصداقه الحقيقيه والصداقه المزيفه
فى حياه كل شخص فينا بيكون فى ناس كتير جدا وأصدقاء اكتر لكن مش كل من قرب لينا كان صديق حقيقى.
الصداقة الحقيقية هى اللى بنختبرها وبنعيشها مش اللى بتتقال بالكلام وبنسمعها وبس.
مش كل قرب بيكون صداقة وبين الصداقه الحقيقيه والمزيفه مواقف كتير بنتكشفها بالافعال مش بالكلام.
مش كل اللي ضحك معانا وفى وشنا كان صاحب ومش كل اللي قرب مننا كان صديق حقيقى.
مع الأسف الحقيقه دي غالبًا مش بنعرفها غير متأخر. بعد موقف يكون وجعنا أوكسر حاجة جوانا أو فى وقت اكتشفنا فيه إننا كنا لوحدنا طول الوقت وإحنا فاكرين نفسنا إننا مش لوحدنا.
الصداقة الحقيقية هى مش كلمة حلوة بتتقال وخلاص ولا خروجه جميله بنقضيها مع بعض كل فتره ولا هى قاعده ضحك وهزار ولا هى علاقة بتتقاس بعدد السنين.
الصداقة الحقيقه هى إحساس بالأمان والراحه والطمأنينه هى إنك تحس إنك مقبول زي ما أنت مقبول بعيوبك قبل مميزاتك، بحلوك ومرك، مقبول من غير ما تتجمل ومن غير ما تمثل ومن غير ما تبقى مطالب انك تفضل حلو وجميل طول الوقت.
الصديق بجد هو اللي وجوده يطمنك، ويريحك ويفرح قلبك مش اللى وجوده يرهقك وويتعبك ويحزنك. الصديق الحقيقى هو اللي يسمعك من غير مايزهق او يمل منك، هو اللى يفهمك من غير ما تشرح او تتكلم هو اللى يطبطب على قلبك وقت اللزوم هو اللى يقف جنبك وقت ما تحتاجه ومن غير ما تطلب منه هو اللى يفرح لفرحك بجد ويحزن لحزنك هو اللى يتمنالك كل الخير والفرح فى حياتك مش اللى يغير منك ويحسدك أو يتمنى الحلو اللى عندك يكون عنده هو. الصديق الحقيقى هو اللى يزعل لزعلك ويحزن لحزنك ويفرح لفرحك هو اللى يشاركك كل لحظه فى حياتك من غير ما يحسسك إنك تقيل أو عبء عليه.
الصداقه الحقيقيه ليها معانى كتير اوى مش هايفهمها غير اللى يعرف المعنى الحقيقى للصداقه.
فى حقيقه موجوده فى كل واحد فينا وهى إننا مش دايماً بنحب نعترف بيه إن في صداقات كتير بتكون حوالينا بتكون مزيفة مش لأنها وحشة من الأول لكن لأنها بتكون مبنية على الأحتياج أو المصلحة أو الفراغ. هى صداقة بتبان من برا قوية لكن هى فى باطنها هشه. تبان إنها قريبة جدا وعلاقه جميله ظاهرياً لكن هى فى الحقيقه علاقه غير أمنه وممكن تكون مؤذيه وبعيده كل البعد عن المعنى الحقيقى للصداقه.
هنا السؤال اللى بيطرح نفسه فى فكر كل واحد فينا وهو إمتى ندإحنا نعرف إن الصداقة دي مش حقيقية وإنها مزيفه؟ الجواب هنا هو لما نلاقي نفسنا دايمًا إحنا اللى بنقدم وندى ونبادر، ونعتذر، ونصلح. لما نلاقى نفسنا إن إحنا الطرف اللى لازم يجى على نفسه ويتنازل عشان العلاقه دى تستمر، لما نلاقى وجعنا بيتقابل بتجاهل، أو بيتاخد بهزار وتقليل ، لما نحس وإحنا قاعدين مع الصديق ده بعدم الراحه في قلبنا وإن وجوده أصبح مرهق ليك وبيستنزف طاقتنا.
الصداقة المزيفة هي صداقه بتستنزفك واحدة واحدة. بتسرق منك طاقتك وهدوءك وسلامك بدل ما يكون العكس هى اللى بتخليك دايما تشك في قيمتك عند الشخص ده وفي إنك من حقك تتحب بجد وبصدق ومن غير أى شروط، هى اللى بتوجعك بدل ما تريحك ، هى اللى دايما تاخد وماتتديش.
لكن الصداقة الحقيقية فهي بتكون علاقه مريحه جدا وبسيطة برغم عمقها. علاقه بتضيف وتدى اكتر ما بتاخد. علاقه أمان وطمأنينه وفرح وشعور بالسلام الداخلى.
الصداقه الحقيقيه هى وجود شخص يحترم حدودك، ويحترم وقت حزنك وصمتك ،وقت وجعك والمك، وقت إختلافك.
الصداقه الحقيقه هى عباره عن شخص يكون مرايتك اللى بتشوف نفسك فيها. هى عباره عن شخص ينصحك وقت اللزوم عشان خايف عليك وبيحبك مش عشان يثبت إنه صح وخلاص. ممكن اوقات الصديق ده يختلف معاك، لكن عمره ما هايكون قصده او يتمنى إنه يكسرك او يخسرك
هنا بقى نيجى للسؤال المهم وهو إزاى أعرف أفرق بين الصداقة الحقيقية والصداقة المزيفة؟
