الخصام .. بقلم ياسمين شفيق
الخصام
بقلم ياسمين شفيق
هل الخصام هو اختبار لقوة العلاقات أم هشاشتها؟ وهل هو يحطمها أم يصنعها من جديد؟
في كل علاقة مهما كانت قوية أو جميله أو ماشية بهدوء بيجي يوم وتتحط قدام اختبار إسمه الخصام. لحظة كدا بتقلب الموازين كلها وبتبين لينا حاجات عمرنا ما كنا هناخد بالنا منها وإحنا فى عز فرحنا وإنبساطناوضحكنا وهزارنا.
يمكن الخصام حاجه مؤلمه فعلا وصعبه ومفيش حد بيتمناه او بيحبه لكن الحقيقة إنه ساعات بيكون مرايا بتعرى اللى قدامك وبتعريك انت شخصيا قدام نفسك. مرايا بتكشف ليك مين بيحبك بجد ومين حبه كان مجرد كلام بيتقال وخلاص .
الخصام قادر يقلب اى علاقه مهما ان كانت من حال لحال.
الخصام ممكن يجي زى زلزال ممكن يكسر كل حاجة في طريقه وممكن يجى زى ريح خفيفه تاخد وقتها
وتعدى ويرجع الهدوء والسكينه مره تانيه.
أوقات إحنا بنفتكر ان الحب لوحده كفاية لكن الحقيقة إن ولا علاقة مهما كانت قوية بتبان على حقيقتها إلا وقت الخلاف. اللحظة اللي فيها ممكن كل حاجه تتلخبط حتى الحب نفسه ممكن يضيع وقتها والمسافات تكبر .اللحظة دى هى اللي بنعرف فيها او بنكتشف
هل إحنا واقفين على أرض ثابتة
ولا واقفين على جبل من الرمل مع أول ريح او نقطه مطر يتمحى.
الخصام بيكشف لينا حاجات مكنتش هاتبان وإحنا في عز القرب وعز الفرح الأنبساط.
بمعنى إن في علاقات وقت الخصام أول ما تتهز بتقع وتنكسر وتتحطم تماما وفي علاقات يمكن بتوقف شويه لكن لعمقها ولصلابتها بترجع مره تانيه وبتستمر وبترجع أقوى مما كانت عليه من قبل .
في الخصام بنعرف مين هايخاف يخسرنا ومين اللى إحنا مش فارقين معاه أصلاً.
مين هايقف يتخانق عشان العلاقة تستمر ومين أول ما يزعل ويغضب هايبص لذاته وكبريائه ويرمي كل حاجة وراه ويمشي.
الخصام مش دايماً علامة نهاية للعلاقه لكنه أوقات بيبقى بداية فهم ووعى لينا. بداية إننا نفهم الناس اللى حوالينا واللى إحنا بنتعامل معاهم وفى علاقه بينا بتجمعنا.
أوقات الخصام بيكشف لينا إن العلاقة كان عمرها قصير، وإن اللي بينا كان أضعف من إنه يعدى مع اول موقف خلاف.
العلاقات القوية مش هي اللي مافيهاش مشاكل لكن هى اللى فيها ترابط قوى وصلب ومتين.
العلاقات الحقيقية هي اللي لما تيجى تبدء تتكسر الطرفين بيمسكوا في بعض جدا عشان الكسر ده ما يحصلش ويحاولوا يتفادوه.
وقت الخصام هو الوقت اللي بيخلي كل واحد فينا يسأل نفسه
هو الشخص ده يستاهل أكمل معاه العلاقه ؟ لو كانت الإجابة نعم يبقى الخصام ده كان مجرد درس يعلمنا و يخلينا نرتبط ببعض اكتر وعلاقتنا تبقى اقوى ولو الأجابه لأ يبقى العلاقه دى كانت هشه وغير صادقه ومتستاهلش إننا نحزن عليها ابدا.
في النهاية…
الخصام مش اختبار لقوه العلاقه او هشاشتها لكنه اختبار لقلوبنا و نيتنا وقدرتنا على الاحتواء والحب اللي نستاهله واللي يستاهلنا.
أفكار ومشاعر ياسمينه
