العلاقات السامه فى حياتنا ومتى تصبح هذه العلاقه مؤذيه 

بقلم ياسمين شفيق عزيز

في حياتنا كلنا بنقابل ناس كويسه وناس سيئه. بعض من هؤلاء الناس وجودهم فى حياتنا المفروض يكون مصدر راحة لينا لكن مع الاسف هم بيكونوا أكتر ناس

سبب فى استنزاف طاقتنا وسلامنا النفسي.

في كل مرحلة من حياتنا، بنقابل ناس بيتركوا أثر فى حياتنا بعضهم بيعلمنا معنى الأمان، وبعضهم بيعلمنا

معنى الألم.

لكن أخطر أنواع العلاقات هي العلاقات اللي شكلها من الخارج حب أو قرب لكن من الداخل سم بطيء بيموتنا بالبطئ يوم بعد يوم من غير ما نلاحظ او نحس.

العلاقات السامة مش لازم تكون علاقه حب فقط، لكن ممكن تكون علاقه صداقة، او علاقه اقرباء او أهل، او زملاء فى العمل او اصدقاء فى مجال الدراسه.

وهنا يمكن تعريف العلاقه السامه بأنها هى وجود شخص فى

حياتنا وجوده بيأثر على نفسيتنا وتوازنا الداخلي.

العلاقة السامه مش شرط تكون واضحه وصريحه في أذاها لكنها ممكن تكون أحيانًا ناعمة وهادئة، وتبان من الخارج انها علاقه جيده جدا لكنها فى نفس الوقت من الداخل بتكون بتقضي على نفسيتنا وسلامنا الداخلي فى صمت.

ازاى نعرف إذا كانت هذه العلاقة سامّة ام لا ؟

اولا نسأل انفسنا  بعض الاسئله :

هل بعد ما بتعامل او بحكى مع هذ الشخص هل بحس انى احسن ولا اسوأ هل انا بكون مرتاح فى وجوده ام لا؟

ثانيا لو فى كل مرة بتعامل فيها مع هذا الشخص هل بشعر انى تعبان ومشوش الفكر وفاقد الثقه فى نفسي وحاسس إنى مضغوط ام لا؟

هل انا فى هذه العلاقه بنجح و بتقدم للأمام ام بفشل وبرجع للخلف،

لو هذه العلامات موجوده يبقى ده دليل قاطع على ان هذه العلاقه علاقه سامه بكل المقاييس

الفرق بين العلاقة الصحية والعلاقه السامه هى ان العلاقه الصحية بتضيف وتبنى ، والعلاقه السامّة بتستنزف وبتهد.

العلاقة الصحية بتوسع وتكبر ، والعلاقه السامه  بتضيق وتخنق

فيه علامات ايضا بتكون واضحةجدا لو ظهرت لازم نتوقف ونعيد التفكير فى هذه العلاقه

ومن هذه العلامات:

1. تقليل دائم من قيمتك

بمعنى ان الشخص السام دايما  يقلل منك، من شكلك، من طريقتك فى التعامل او فى الكلام من اسلوبك فى حياتك ومن شغلك او دراستك بمعنى التقليل من اى حاجه بتعملها كأن كل خطوة بتاخدها هى خطوه غلط وغير صحيحه في نظره.

2.يعطيك شعور دائم بالذنب ، الشخص السام طول الوقت يحسسك دايما بالذنب وإنك انت الغلطان فى كل شئ حتى لو كان العكس

3. الأخذ بلا مقابل بمعنى هو مسموح له ان ياخد وقتك، مشاعرك، دعمك، أعصابك واهتمامك وحبك ولما تحتاجه انت تلاقيه غير متواجد  تماما

4. اهتمام متقطّع ومؤذي بمعنى يقرب قوي ويبعد فجأة يدى كلمتين حلوين بس عشان يضمن وجودك وبعدها يرجع لبروده وعدم اهتمامه.

5. التلاعب بالمشاعر وده يحدث عندما يتعصب ويغضب فايقوم بالصمت العقابي والأختفاء والبعد والهدف من ده إنه يعطيك الشعور بالخوف من انك ممكن تخسره.

6. لا يسمعك ولا يتفهمك بمعنى ان الشخص السام معندوش فكره الأنصات والتفهم والتفاهم لكن عنده فرض الرأى والتحكّم والسيطره.

7. استنزاف نفسي مستمر

وهو استنزاف لطاقتك وصحتك ونفسيتك

وايضا

كل ما تقرب تتعب أكتر

كل مجهودك يضيع ومافيش تقدير

لما تكون سعيد يكسر فرحتك

دايمًا عايز ياخد وهو مابيقدمش حاجة نهائي

وجوده يسبب توتر بدل الطمأنينة

بتخاف تتكلم قدامه بصراحة

بتحس إنك مش كفاية مهما عملت

لماذا بنستمر في علاقة مؤذية؟

بنستمر ليس لأننا ضعاف ولكن لأننا بنتعلق بالأمل  ولأعتقدنا ان بأمكانا تغيير هذا الشخص أو لخوفنا ان نخسره أو لاننا اتعودنا على اهتمامه الزائف وسط بحر الإهمال أو عشان بنصدق وعوده اللى الكاذبه

لكن الحقيقة؟

اللي يحب حد بجد مش بيخليه يختار بينه وبين نفسه

كيف نواجه العلاقة السامة؟

مش لازم نقطع العلاقه فورًا لكن لابد ان نبدأ بالخطوات التاليه:

1. الاعتراف إن العلاقة مؤذية

2. وضع حدود واضحة

3. التقليل من التواصل تدريجيًا

4. الاهتمام بالنفس واكتشاف قيمتنا

5. طلب مساعدة لو محتاجين دعم

6. اتخاذ القرار الخروج من هذه العلاقه لان الخروج من علاقة سامة مش هروب لكن ده منتهى الشجاعة

الخلاصة

هى ان العلاقات السامّة زي السم البطيء مش بنكتشفش تأثيره إلا لما نتعب.

والخروج من العلاقه دى مش خساره لكن دا أكبر مكسب لروحنا.

لابد دايمًا اختيار الناس اللي بتحترم مشاعرنا وبتسمعنا، ووجودها يخلّي قلبنا أخف مش أثقل وفرحان مش حزين