يارا حمدى صالح تكتب: بتعرفوا تتخانقوا ؟! اتجوزا !!
بتعرفوا تتخانقوا ؟! اتجوزا !!
الانسان بطبعه بيميل لكل ما هو مريح، بينجذب جدا لكل التفاصيل البراقة الخاطفة. عاشق بجنون لاحاسيس السعادة اللي بترفعه لسابع سماء.
و لكن، سامحني ايها الانسان!!
الدنيا الكبد اتخلق فيها عشان يبقى قانون واي حاجة لها بريق زائد عن الطبيعي، مسيره في يوم ينطفي، و السعادة ماكنتش هتبقى ” سعادة ” من غير ما ” الحزن ” يجي يعلمنا حلاوتها !!
الصفات المبهرة في البشر عمرها ما كانت دايمة، دايما هيحصل حاجة من الاتنين،
اما انها شوية وهتروح،
او ( الطرف التاني ) هيتعود عليها !!
لذلك، اخطر ما في هذا النوع من الصفات البراقة انها جاية تغلوش عليك.
تخيل معايا كده انك اول ما دخلت اوضه لقيت نور ضرب في وشك!!، او و انت بتفتح شباك، الشمس شعاعها خبط عينيك!! يا ترى هتشوف اي حاجة !!
مستحيل طبعا، التتيجة هتبقى رؤية معدومة تماما ..
يبقى انت محتاج اضاءة طبيعية عشان تعرف تشوف كويس، محتاج عينيك تخف من قوة بريق الشمس عشان تبدأ تجمع صورة المكان اللي انت فيه
محتاج وضع طبيعي مفهوش ابهار..
الصفات الطيبة و الحميدة في البشر كلنا بنعرف نتعامل معاها و معندناش مشكلة فيها و بديهي مش هتسبب اي خلاف، لكن هنختلف في مين قادر يتعامل مع انهي نوع من العيوب.
في شخص بيكره الغيرة،
و غيره بيعتبر عدم الغيرة برود !!
في شخص بيحب يعرف التفاصيل و عاشق للسيطرة
و غيره معندوش خلق للكلام ده، و مؤمن ان كل واحد فينا له ارادة مستقلة و حرية و راي !!
في شخص بيستحمل العصبية و شخص تاني الصوت العالي بالنسبة له اهانه !!!
على فكرة، محدش فينا يقدر يقول ايه صح و ايه غلط في الحالات اللي فاتت دي، طرفين العلاقة و كفى.
لذلك، ركزوا على الصفات اللي بتصنف سلبية وراقبوا قدرتكم في التعامل معها.
بديهي مش مفروض انك تلاقي روحك مستمتع بيها، و لكن مهم تبقى قادر بس تستوعبها.
هو ده المعيار الاهم و اللي ممكن يقيس اذا كانت العلاقة دي هيتحقق فيها السكن و المودة و الرحمة، هو ده المعيار اللي ممكن يقيس اذا كانت العلاقة دي هتكمل في السراء و الضراء و الصحة و المرض !!
الخلاصة
حتى الخلاف مهم نبقى عارفين ازاي نمارسوا…
حتى الخلاف لازم نتفق فيه
لذلك، لو بتعرفوا تتخانقوا، اتجوزوا
