قالوا عنها سترونج !!
كتبت يارا حمدي
قالوا عنها سترونج !!
الستات بقيت عندية !!
الستات بقى صوتها عالي !!
الستات بقيت ماشية بدماغها!!
هي فين الستات بتاعت زمان !! .
عفوا حضرتك، اسأل السؤال الصح الاول، وهي فين الرجالة بتاعت زمان؟!!
ربنا سبحانه وتعالى خلق آدم قبل حواء، ولما آدم استوحش الجنه فربنا خلق له حواء
لو ركزنا كمان في اهم عملية بتحصل في البشريه و هي عملية التزاوج واللي من خلالها بيستمرالكون، هنلاقي المرأة فيها بمثابة جهاز استقبال من الرجل اولا.
التفاصيل دي مش صدفة، التفاصيل دي بتشاور على ان الاصل بيبدأ عند الرجل اولا و ان المرأة في الاغلب هتكون رد فعل.
انا هنا لا اقصد ان ادافع عن المرأة، انا بس بحاول انبه لفطرة المرأة الطبيعية، اما النماذج المشوهه فدعونا منها الان .
المرأة اللي طبيعتها رقيقة مينفعش تبقى سترونج يا سيدي!
المرأة الطبيعية مش عاوزة تبقى اندبندنت يا عزيزي!!
المرأة الطبيعية محتوى تبحث عن من يحتويها !!
و لكن !
فكرة ان رحم المرأة هو بمثابة عالم متحرك، كان فيه اشارة لقدرة ربنا ميزها بيها الا وهي القدرة على التكيف.
الست لو ملاقيتش رجل يتحمل مسؤوليتها، لازم هيطلع لها عضلات عشان تعرف هي اللي تشيل !
الست اذا غاب عنها رجل يدافع عنها، لازم صوتها هيخشن عشان تعرف تعيش.
الست اذا غاب عنها رجل حكيم قادر ياخد قرار، طبيعي مش هتثق فيما بعد الا في نفسها.
الست اسعد لحظات حياتها لما تبقى ” ست ” و بس من غير اي صفات تانية تتحشر بعدها و تتفرض عليها.
الست بتتجبر على التحول لنموذج الرجل اللي تمنت انها تلاقيه و للاسف اتخذلت فيه، وتبدأ تعيش في صراع بين فطرتها اللي ربنا خلقها بيها والنموذج المشوه اللي مفروض تتقولب جواه عشان تعرف تستمر في هذا العالم الموحش.
المؤلم ان بعد كل ده المجتمع مش بيرحمها، ده بيتنمر عليها و على سلوكها و يتوجه ( كعادته ) بكل اصابع الاتهام لها..
الخلاصة يا سيدي،
المجتمع اللي فيه اشباه رجال،
طبيعي هتكون فيه الست سترونج اندبندنت
” مجبورة.!!”
