يارا حمدى صالح تكتب: الشخص المزاجي !!
الشخص المزاجي دائما متهوم بانه صعب المعشر ..
يضحك شوي …و يحزن شوي..
موجود بيتنفس ومتفاعل، و فجأة مختفي منعزل
الشخص المزاجي مشاعره مطلوقة مالوش عليها سلطان او سيطرة
حدود مشاعره الارض و السماء ..
لما الشجر يصفر و يحزن، هو بيحزن معاه
لما الشمس تقوى، هو بيقوى معاها
و لما السماء تغيم برضه روحه بتنطفي معاها
الشخص المزاجي وحدته دنيا،
فيها دوشة و زحمة
دايما متجاب على بوزه جواها غصب عنه
الشخص المزاجي حر بزيادة
رابط واحد بس اللي بيدور جوة فلكه
يطلعه و ينزله و يبيكه و يفرحه
احساسه
يروح للناس عشان ” موجودين”
ولانه هو كمان موجود
و مع ان وجوده غيرهم
بس الوجود ميبقاش الا بالاتنين متجمعين
الشخص المزاجي توجعه حاجات غير الحاجات
كاسر باحساسه كل ابعاد المنطق و الحسابات
تفرحه ضحكة بريئة صغيرة
و تبكيه فكرة لسه جاية بتتمشى في الطريق متحيرة ..
الشخص المزاجي هو السهل الممتنع
ربنا جابه في الدنيا عشان يحط بيه الالوان .
جي عشان يخلي الدنيا تبقى ” حياة”
جي يبدل وجعه و معاناته
و يخلق لنا من كلمه ” اه ” ميت الف كلمة ” الله ”
يارا حمدي صالح
