البلوجر… صناعة فضائح وتدمير بيوت
بقلم المستشارة هدى الخضراوي
في الشهور الأخيرة ظهرت موجة خطيرة على السوشيال ميديا
بلوجرز وبلوجرستات قرروا إن أسرع طريق للشهرة والفلوس هو الفضائح
واحدة تروح تصور لايف في الشارع وتعمل مشكلة مفتعلة عشان تتصدر الترند
واحدة تانية تطلع تشتكي من التحرش وهي في الحقيقة اللي نصبت الفخ للشخص المستهدف، ضيعت مستقبله ومستقبل أسرته في لحظة، والكارثة لما تيجي تبص على صفحتها تلاقيها مليانة صور ومقاطع منتهى الخلاعة والتحريض على الفسق
ولما تنتقدها يقولك “دي حرية شخصية” أي حرية في العهر وتشويه سمعة الأبرياء
القضية مش حادث فردي دي بقت ظاهرة
في كذا واقعة انتشرت الفترة اللي فاتت لشباب اتقبض عليهم أو اتشوهت سمعتهم بسبب بلوجر عملت عليهم فيلم كاذب عشان تكسب مشاهدات وتلم تبرعات وتعمل إعلانات
وفي الآخر حتى لو اتبرأت الضحية حياته اتدمرت
⸻
الأضرار مش بس أخلاقية… دي أمن قومي
النوعية دي من المحتوى بتشوه صورة البلد قدام العالم
بتصدر فكرة إن المجتمع كله منحرف وإن المرأة المصرية إما ضحية مستمرة أو أداة ابتزاز
الموضوع بيأثر على سمعة السياحة، بيضرب ثقة الناس في بعض، وبيخلق حالة من الخوف وعدم الأمان الاجتماعي
⸻
المطلوب فورًا
• إصدار قانون يلزم أي بلوجر أو صانع محتوى بالتسجيل والترخيص الرسمي
• فرض ضرائب ومراجعة مصادر دخلهم
• معاقبة أي محتوى مُخل أو كاذب أو مُحرض على الفسق بالسجن الفوري
• تجريم نصب الفخاخ وتشويه السمعة تحت غطاء “المحتوى”
⸻
لو الدولة ما تحركتش دلوقتي هنلاقي الجيل اللي جاي شايف إن الشهرة مش موهبة ولا علم ولا شغل شريف
هتبقى الشهرة بالنسبة لهم إنك تفضح وتشوه وتكذب وتبيع الأخلاق عشان لايك ومشاهدة
#البلوجر_سرطان_المجتمع
#ضد_الابتزاز_الإلكتروني
#أوقفوا_فساد_السوشيال
#تحريض_على_الفسق
#السوشيال_مش_حرية_في_العهر
#تشويه_السمعة_جريمة
#قانون_ضد_البلوجرز
#بلدنا_مش_ترند
#الحرية_مش_عهر
#جيل_بيضيع
