تريندات تشوّه مصر أم الدنيا .. وسكوتنا جريمة !
بقلم المستشارة هدى الخضراوي
اسمع كويس الكلام ده وركز
بقينا في زمن أي حد يفتح الكاميرا
يقعد يحكي، يتّهم، يعيّط
وإحنا نتفرج ونسقف ونشير
بس المرة دي مش زي كل مرة
المرة دي في واحدة بتقول أنا بنت الرئيس
والتانية بترد تقول دي نصابة وبتتاجر في الأعضاء
والتالتة بتتاجر في المخدرات
ورابع بيهدد، وخامس بيصور لايفات فضايح من جوه البيوت
والكارثة؟
الصورة اللي طالعة عن مصر بره مرعبة
بنشوّه نفسنا بإيدينا
قدام العالم كله
بنتصدر التريند بالفضايح
مش بالعلم ولا الشرف ولا القانون
لما السوشيال تتحوّل لوكر فضايح
لازم نسأل
فين الدولة؟
فين الوعي؟
فين القانون؟
القانون مش لعبة
القانون آخر سور واقف
بيحمي الناس من بعض
من الكدب
من الاتهامات
من التشهير
من الست اللي تصحى تلاقي نفسها متهمة في لايف
من الطفل اللي بيتهدم عيلته من فيديو مفبرك
من بلد كاملة بيتم اتهامها إنها سوق نخاسة على منصات التواصل
الشعب اللي بيحترم نفسه
ما يسيبش السوشيال تمثّله
إوعى تفتكر إنك بعيد عن ده
السكوت مشاركة
الضحك مشاركة
الفرجة مشاركة
لو كلنا سكتنا
بكره تكون إنت أو بنتك أو ابنك تريند
ومش هتعرف توقفه
مش كل لايف حقيقة
ومش كل دمعة صدق
ومش كل فيديو دليل
ومافيش تريند في الدنيا يساوي سمعة وطن
السكوت على الفضايح دي مش حياد
السكوت جريمة
واللي سايب السوشيال تاكل فينا
هو اللي بيهدم البلد وهو ساكت
القانون لازم يرجع يشتغل
والمنصات لازم تعرف إن فيه حدود
وإحنا كشعب لازم نقول
كفاية
