شوف الخسائر.. ايران تنفذ أقوى وأعنف قصف على تل أبيب منذ بدء الحرب!
النهارده الفجر وأثناء ما احنا نايمين، إيران نفذت أقوى وأعنف قصف على تل أبيب منذ بدء الحرب!حوالي 30 صاروخ ما بين باليستي وفرط صوتي تم اطلاقهم، عشان يدكوا وسط تل أبيب نفسها ويسببوا أضرار خيالية محدش هناك كان متوقعها حتى في أسوأ كوابيسه..
طب الضربات وصلت لفين؟!خد عندك: 
تدمير أجزاء من مبنى البورصة في تل أبيب..
إصابة بيت داني نافيه، عضو الليكود ووزير البيئة السابق..
إصابة مباشرة لمبنى المخابرات العسكرية..
إصابة مباشرة لمبنى وزارة الحرب الإسرائيلية..
بس أهم هدف فيهم واللي حرفيًا قالب الدنيا دلوقتي في الكيان، هو قصف مستشفى سوروكا العسكري في بئر السبع، اللي بيتعالج فيه الجنود والضباط اللي راجعين من غزة!القصف ده كان قوي لدرجة ان جزء من المستشفى اتهد، وبعدها حصل تسريب لمواد خطيرة جواه اجبرت الصهاينة على اخلاءه بالكامل..
الجميل بقى ان الإيرانيين بيقولوا انهم مكانوش مستهدفين المستشفى نفسه، وان الهدف الرئيسي للهجوم هو المقر الكبير لقيادة واستخبارات جيش الدفاع الإسرائيلي (IDF C4I) الموجود تحته، ومعسكر استخبارات الجيش في الحديقة التكنولوجية “غاف يام”، الموجودة جوار المستشفى!يعني الصهاينة بيستخدموا المدنيين والمستشفيات كدروع بشرية، بالظبط زي ما كانوا بيبرروا قصفهم للمستشفيات في غز.ة.. المرة دي حصلت فيهم هما…
طبعًا زي ما انت متخيل، الإعلام الصهيوني قالب الدنيا دلوقتي بعد اللي حصل ده، وعمال يتهم الإيرانيين بإنهم بيستهدفوا مباني مدنية ومستشفيات وان دي جرائم حرب وما إلى ذلك.. ومباشرةً بعض الضربة الإيرانية، أكتر من 40 طيارة حربية اسرائيلية طلعت ووجهت ضربة ضخمة على أهداف في قلب طهران.. وأهم ضربة كانت لمفاعل “أراك” النووي الإيراني…المفاعل ده اتبنى سنة 1997، وإيران كانت عايزة تخصب فيه بلوتونيوم بدل اليورانيوم اللي بتخصبه في مفاعلاتها الأخرى.. بس بسبب ضغوط دولية كانت موقفة شغلها فيه وسايباه على الرف ككارت تفاوض أو ضغط تستعمله في اللحظات الأخيرة.. لكن القصف الاسرائيلي دمره بالكامل تقريبًا…
حسب وسائل الإعلام الإسرائيلية، فنتيجة القصف الإيراني الأخير في لحد دلوقتي 50 إصابة مؤكدة، 3 منهم في حالة حرجة… وفي أنباء انتشرت من كام ساعة في صحيفة الوول ستريت جورنال، بتقول ان الجيش الأمريكي دلوقتي بيساعد بإجلاء الدبلوماسيين غير الأساسيين وعائلاتهم من السفارة في إسرائيل..يالا بالشفاء على قلوبهم..
هتلاقي المصادر في الكومنتات كالعادة، والصور اللي تحت دي لشكل تل أبيب وشكل المستشفى بعد قصفها دلوقتي
