في صلاة العيد
هدى الخضراوي
في لحظة في صلاة العيد
بتحس إنك راجع… مهما كنت بعيد
بتلاقي نفسك وسط ناس كتير
بس قلبك لوحده واقف قدّام رب كبير
تكبيرات… بتنفض من على روحك غبار الأيام
وسجدة… بتنزل فيها كل اللي مافهمتوش في السنة اللي فاتت
ودمعة… يمكن محدش شافها
بس ربك شافها… وحسّها… وكتب بيها فرحة جاية
صلاة العيد مش مجرد ركعتين
دي لحظة نقية
كأنك اتغسلت من جواك
وخرجت من المسجد خفيف… وفي قلبك نور
العيد مش بس لبس جديد ولا ضحكة على الفتة
العيد إنك تحس إنك اتولدت من جديد
وإنك نضيف
وإنك لسه قادر تبدأ
حتى لو اتكسرت قبل كده
كل عيد وإنت أقرب للي خلقك
كل عيد وقلبك أنضج… وروحك أهدى… ونفسك أطهر
وكل عيد وانت واقف في الصف الأول… ما بين يديه
