إزاي تعرف إنك في علاقة سامة ؟

بقلم – د. ياسمين عز  الدين 

أغلبيتنا بيتعامل مع ناس متعبة ، وبنبقي مش عارفين ليه بيعملوا كده ، ولا عارفين إيه الحل معاهم .
العلاقات المتعبة إسمها علاقات سامة لإنها بتسمم حياتك

( طيب إزاي تعرف إنك في علاقة سامة ؟ )

العلاقات السامة بتسبب لك التعاسة والحيرة وعدم الراحة وعدم السعادة ، علاقة مفهاش استقرار .

يعني كل شخص هيتصرف تصرف سئ بقي سام ؟
لا طبعا ، الشخص السوي هيتحسن ومش هيزعلك تاني
علي نفس الموقف .

( طيب إزاي تعرف إن الشخص ده سام ولا لأ ؟ )

1- ( التلاعب بيك) وارسال الرسالة وعكسها ، هيقولك إنه بيحبك وهيتصرف عكس كده ،
وحتي مشاعره مش هتبقي ثابتة معاك .

2 – ( إلقاء اللوم عليك دائما ) مش بيعترف بغلطه نهائي ،
ولو قدرا اعترف يبقي انت السبب لإنه اتصرف كده نتيجة تصرفاتك انت وهو اللي هيزعل كمان منك ،
بس خلي بالك هو متأكد إنه غلط .

3 – محاولة إبقائك بعيد عن الناس ، حتي يتم السيطرة عليك
ومش تكتشف ألاعيبه ، لإنك ممكن تقارن معاملته بمعاملة الآخرين ليك .

4 – هتلاقي أهم حاجة عنده مصلحته وبس ، هو أصلا مش بيحبك هو بيحب اللي بيحصل عليه منك .

( طيب إيه الأسباب اللي بتخليك تدخل في علاقة سامة ؟ )

1 – بحثك عن القبول من الآخرين ، فبتضطر تستحمل تصرفات سيئة من الآخرين لمجرد إنهم يقبلوك .

2 – الخوف من التغيير ، إنت خايف تاخد قرار رغم إنك متأكد إن الصح تبعد عن العلاقات السامة .

3 – عدم ثقتك في نفسك ، إنت شايف إنك متستهلش
ناس كويسة في حياتك .

4 – عدم إدراكك لقيمتك ، لإنك لو أدركت قيمتك إنت اللي هترفض العلاقات السامة دي .

(طيب ايه طرق التشافي من العلاقات السامة ؟ )

افتكر إن العلاقات السامة دي عاملة ذي المخدرات
المدمن لازم يبعد عن المخدرات حتي لو بيحبها ،
ولازم يفهم إن تاجر المخدرات هيحاول يجذبه تاني ،
فمينفعش يبقي في تعامل تاني ، ده لو عايز تتشافي ،
العلاقات السامة نفس القصة .

1 – اعرف إن تعبك ده مجرد وقت وهيعدي ، وتقبل ألمك ،
بلاش تلوم نفسك انت بشر ومعرض انك تتخدع .

2 – اعرف إن ده مش حب اصلا ، ده سم ،
ولازم تتعافي من السم ده .

3 – حدد من البداية ايه هي المواصفات اللي انت عايزها
في التعامل مع الناس .

4 – ذود ثقتك في نفسك واعرف قيمتك ومتقبلش بأقل مما تستحق .

5 – اعرف واجباتك من حقوقك ، عشان محدش ياكل حقوقك

6 – متخافش تخسر حد مش مناسب معاك ، خايف ليه !!!